Gjatë verës, një akullore freskuese ose një pije me akull shpesh shihen si mënyra më e shpejtë për t’u freskuar.
Por sa shpesh ndalemi të mendojmë për ndikimin që këto produkte mund të kenë në shëndetin tonë tretës?
Nga ngadalësimi i funksioneve enzimatike deri te përkeqësimi i simptomave te personat me probleme gastrointestinale, konsumimi i ushqimeve dhe pijeve shumë të ftohta mund të sjellë pasoja që jo gjithmonë i marrim parasysh.
Enzimat që ndihmojnë në tretjen e ushqimit funksionojnë më së miri në temperaturën trupore.
Vellhealth.com shkruan se konsumimi i ushqimeve dhe pijeve shumë të ftohta mund të ngadalësojë aktivitetin e tyre, duke e bërë procesin e tretjes më të ngadaltë dhe më pak efikas.
Pijet e ftohta shkaktojnë ngushtim të enëve të gjakut në traktin tretës, duke kufizuar qarkullimin e gjakut dhe furnizimin me oksigjen.
Si rezultat, tretja mund të ngadalësohet ndjeshëm.
Temperatura e ulët ndikon negativisht në kontraksionet muskulore të zorrëve (peristaltikën), duke penguar lëvizjen normale të ushqimit në sistemin tretës, një shqetësim i veçantë për personat me sindromën e zorrës së irrituar (IBS).
Akullorja, për shkak të përmbajtjes së saj me sheqer dhe yndyrë, mund të relaksojë sfinkterin mes ezofagut dhe stomakut, duke rritur gjasat për refluks acid.
Në kombinim me temperaturën e ftohtë, kjo mund të rrisë rrezikun për gastrit apo ulcerë.
Për ata që vuajnë nga intoleranca ndaj laktozës, akullorja mund të shkaktojë fryrje, gazra dhe diarre.
Kur konsumohet bashkë me pije të ftohta, simptomat mund të bëhen më të theksuara.
Disa persona raportojnë ndjesi dhimbjeje ose shqetësime në stomak pas konsumit të akullores me stomak bosh, siç dëshmohet edhe në përvoja të ndara në komunitete online.
Pijet shumë të ftohta mund të ulin efikasitetin e kontraksioneve të stomakut, duke ngadalësuar procesin e zbrazjes gastrike dhe ndikuar në ndjesinë e ngopjes.
Pijet e gazuara përmbajnë dioksid karboni, i cili krijon presion të brendshëm në stomak, por kur kombinohen me akullore, këto efekte mund të përkeqësohen.
Uji shumë i ftohtë mund të shkaktojë rritje të përkohshme të tensionit të gjakut.
Tek personat me achalasia, një çrregullim i ezofagut, pijet e ftohta mund të përkeqësojnë simptomat.
Personat që vuajnë nga sindroma e zorrës së irrituar (IBS), refluksi, gastriti apo intoleranca ndaj laktozës janë më të ndjeshëm ndaj efekteve të akulloreve dhe pijeve shumë të ftohta.
Tek personat pa probleme të theksuara gastrointestinale, këto efekte janë zakonisht të lehta dhe të përkohshme.
Konsumoni akulloren ose pijet e ftohta pasi të jenë ambientuar pak me temperaturën e dhomës, gjithashtu shmangni pijet shumë të ftohta gjatë vakteve, për të mos ngadalësuar tretjen.
Kujdes! Mos i kombinoni menjëherë akullore me pije të gazuara.
Nëse keni probleme të njohura gastrointestinale, konsultohuni me mjekun tuaj për këshilla të përshtatura.
