Pacienti 41-vjeçar, i plagosur një ditë më parë në Gjilan me armë zjarri, është në gjendje stabile pas ndërhyrjes kirurgjikale në Klinikën e Kirurgjisë Abdominale në QKUK.
Drejtori i Kirurgjisë Abdominale, Enver Fekaj, tha se pacienti ka pësuar lëndime të shumta, përfshirë edhe dëmtim serioz në abdomen.
“Bëhet fjalë për një pacient 41 vjeçar, Bujar Hoxha nëse nuk gaboj është emri i pacientit. Ai ka pasur lëndime në kokë, disa gërvishtje në dy duart, dy ekstremitetet e sipërme. Lëndimin më serioz e ka pasur në abdomen. Lëndimet në kokë, për këto lëndime janë kompetentë neurokirurgët, janë thirrur në konsultim dhe ata kanë bërë përpunim plage, por gjendja e vetëdijes nuk ka qenë e kompromituar dhe s’ka pasur nevojë për ndërhyrje urgjente nga ana e kirurgut, por për një përcjellje të vazhdueshme,” tha Fekaj.
Sipas tij, dëmtimi në abdomen është shkaktuar nga veprimi i armës së zjarrit dhe ka prekur zorrën e hollë.
“I ka pasur pesë përpunime, është bërë shkurtimi i zorrës, ngjitja e zorrës. Aktualisht e evidentova edhe personalisht, pacienti është stabil, është i vetëdijshëm, por për shkak të intervenimit kirurgjik që ka pasur normalisht që kërkon një përcjellje dinamike. Për momentin është stabil”, tha ai.
Pacienti fillimisht është pranuar në Qendrën Emergjente të QKUK-së, pas plagosjes në Gjilan, dhe më pas është transferuar për trajtim në Kirurgjinë Abdominale.
