Njësia Rajonale për Hetimin e Trafikimit me Narkotikë në Prizren, në bashkëpunim me Prokurorinë Themelore, ka finalizuar me sukses një operacion antidroge duke arrestuar një 31-vjeçar të dyshuar për posedim dhe shpërndarje të kokainës.
Operacioni është zhvilluar më 11 gusht 2025 në rrugën “Viljam Voker” të Prizrenit, ku i dyshuari H.K. (1994), shtetas i Republikës së Kosovës, u ndalua nga policia.
Gjatë kontrollit të autorizuar nga prokurori, në dy lokacione të ndryshme u sekuestruan:
- 4 kg e 440 gram kokainë
- Dy peshore elektronike
- 260 euro para të gatshme
- Pajisje për vakumim të qeseve plastike
- Motoçikletë PIAGGIO VESPA
- Telefon mobil iPhone 15 Pro Max
- Një skalper dhe qese plastike për paketim
Sipas vlerësimeve, sasia e kokainës në tregun ilegal kap vlerën e rreth 300 mijë eurove.
I dyshuari u intervistua në prani të avokatit dhe me vendim të prokurorit është ndaluar për 48 orë, ndërsa hetimet po vazhdojnë. Policia e Kosovës bën thirrje për bashkëpunim qytetar, duke raportuar çdo aktivitet të dyshimtë që lidhet me narkotikët.
