Kuvendi i Kosovës pritet që të enjten të mbajë seancë të jashtëzakonshme, e thirrur nga Lidhja Demokratike e Kosovës.
Seanca do të fillojë në orën 12:00 dhe aty do të debatohet për skandalet dhe keq menaxhimi në Korporatën Energjetike të Kosovës.
Shefi i Grupit Parlamentar të LDK-së, Arben Gashi, ka theksuar se në emër të 43 deputetëve të nënshkruar, ka thirrur seancën e jashtëzakonshme.
“Kjo kërkesë është bërë për të adresuar skandalet në Korporatën Energjetike të Kosovës (KEK), që kanë ngritur shqetësime të mëdha për publikun dhe institucionet”, ka shkruar Gashi në Facebook.
Njëjtë sikur vepruan herën e kaluar, pushteti as këtë herë nuk do marrë pjesë në seancë.
Deputeti i partisë në pushtet, Enver Dugolli, thotë se bojkoti i tyre do të vazhdojë derisa të ndërrojë mendje opozita dhe të votojë marrëveshjet ndërkombëtare.
