Deputetja e LDK-së, Hykmete Bajrami, është shprehur e ashpër me Lëvizjen Vetëvendosjen duke i quajtur veprimet e tyre “patriotizëm të rremë”.
“Hajnitë, dështimet, tenderët njëburimorë, nepotizmi, kapja e institucioneve dhe lidhjet me mafinë energjetike, NUK mund t’i mbuloni me patriotizëm të rremë, as me Serbinë, as me urat që po i ndërtoni dhe as me Listën Serbe”, thuhet në reagimin e Bajramit.
“Ju jeni të njëjtit që Radojçiqit i keni krijuar korridor dhe ka ikur në pikë të ditës, nën vëzhgimin e kamerave, dhe nuk e keni shpallur Listën Serbe organizatë terroriste as pasi ata e kanë marrë përgjegjësinë për sulmin terrorist në Banjskë”, është shprehur Bajrami.
“Sot po i luani patriotët – hipokrita!”, përfundon ajo.
Lista Srpska nuk është certifikuar për të marrë pjesë në zgjedhjet lokale të 12 tetorit sot në mbledhjen e KQZ-së.
Dy anëtarët e LVV-së, Sami Kurteshi dhe Alban Krasniqi, votuan kundër.
Kryetari i KQZ-së, Kreshnik Radoniqi, dhe përfaqësuesja e Listës Srspka Gordana Llaban Zuvic votuan pro, kurse të tjerët abstenuan.
“Dy vota për, dy kundër dhe 7 abstenime, refuzohet certifikimi i partisë politike Lista Srpska dhe listës së kandidatëve të saj”, tha Radoniqi.
