Më shumë se 800 persona kanë vdekur dhe gati 3,000 të tjerë janë lënduar, pasi një tërmet me magnitudë 6.0 ballë goditi Afganistanin lindor pak para mesnatës të dielën.
Shumica e vdekjeve ndodhën në provincën Kunar, thonë zyrtarët, duke paralajmëruar se numri i të vdekurve mund të rritet ndjeshëm pasi fshatra të tëra janë shkatërruar.
Epiqendra ishte në një zonë të largët malore, duke e bërë të vështirë kryerjen e operacioneve të shpëtimit. “Shkalla e shkatërrimit është e paimagjinueshme”, tha një zyrtar i talebanëve.
Katastrofa vjen në një kohë kur Afganistani po përballet me thatësirë të madhe, shkurtime të ndihmave dhe atë që Programi Botëror i Ushqimit e përshkruan si një krizë të paprecedentë urie.
Tërmeti goditi të dielën në orën 23:47 sipas kohës lokale, rreth 27 km (17 milje) në lindje të Jalalabadit – qyteti i pestë më i madh i vendit, në provincën lindore Nangarhar.
Një banor i Mazar Dara, në rajonin Nurgal, tha se 95% e fshatit ishte shkatërruar – me pesë deri në dhjetë persona të plagosur në çdo familje.
Shtëpitë në zonë janë ndërtuar me tulla balte, si dhe janë afër njëra-tjetrës.
Dëmi më i keq ishte në Kunar – një rajon i thyer malor me tokë të kufizuar bujqësore.
Rrugët në zonë shpesh janë shtigje balte që gjarpërojnë rreth maleve – ndërsa shtëpitë janë të ndërtuara nga argjila, gurët dhe balta.
Rajoni ka parë gjithashtu përmbytje masive dhe rrëshqitje toke gjatë ditëve të fundit, duke bllokuar aksesin në shumë zona.
Me rrugët e bllokuara, operacionet e shpëtimit mund të kryhen vetëm nga ajri dhe ekipet nuk mundën të arrinin në zonë deri në mëngjes pasi helikopterët nuk mund të uleshin në male natën.
Megjithatë, që atëherë janë kryer më shumë se 100 fluturime në mot të kthjellët.
Spitali kryesor i Jalalabadit ishte tashmë i mbingarkuar, duke qenë pikërisht në qendër të pikës së kalimit për dhjetëra mijëra afganë që po deportoheshin nga Pakistani kufitar.
Një mjek tha se rreth 460 viktima ishin sjellë që nga tërmeti – 250 të shtruar në spital, të tjerët u trajtuan dhe u liruan nga spitali.
Lidhja me internetin në ato zona është shumë e kufizuar, duke e bërë të vështirë komunikimin dhe koordinimin.
Që nga gushti i vitit 2021, Afganistani ka qenë nën kontrollin e talebanëve, qeveria e të cilëve njihet vetëm nga Rusia.
Disa agjenci ndihme dhe organizata joqeveritare pezulluan punën e tyre në Afganistan kur grupi islamist i vijës së ashpër erdhi përsëri në pushtet.
Shumica e donacioneve të huaja për Afganistanin janë pezulluar dhe sanksionet ndërkombëtare, të cilat datojnë që nga koha kur talebanët erdhën për herë të parë në pushtet në vitet 1990, janë ende në fuqi – megjithëse janë bërë përjashtime për ndihmën humanitare.
Qeveria talebane ka bërë një thirrje për ndihmë pas tërmetit të së dielës.
