Real Madrid ka arritur një fitore në javën e 4-të të La Ligës, duke mundur në transfertë skuadrën e Real Sociedad.
Sfida nisi me ritëm të lartë në San Sebastian, me Arda Guler që tundi rrjetën që në minutën e 2’, por ndërhyrja e VAR e bëri të pavlefshëm.
Pas 10 minutash ishte Mbappe, i cili kaloi në avantazh ekipin e Xabi Alonsos.
Gjërat u vështirësuan për “Galaktikët”, të cilët ngelën me 10 lojtarë pas daljes me karton të kuq të Huijsen në minutën e 32’.
Gjithsesi, ekipi madrilen nuk u demoralizua dhe Guler, pas një asisti të Mbappe, shënoi sërish dhe këtë radhe ishte i rregullt.
Pjesa e dytë ishte më e vuajtur për “Los Blancos”, kjo pasi vendasit shkurtuan diferencën me Oyarzabal, falë një penalltie në minutën e 56’.
Në kohën e mbetur, madrilenët arritën të ruanin rezultatin, duke marrë kështu tri pikët e radhës në kampionat dhe duke udhëhequr La Ligën me pikë të plota pas 4 javësh.
