Një gjyqtare federale në SHBA ka bllokuar përkohësisht përpjekjen e ish-presidentit Donald Trump për të dislokuar trupa të Gardës Kombëtare në qytetin Portland, pavarësisht kundërshtimeve të guvernatorëve demokratë të Kalifornisë dhe Oregonit.
Vendimi vjen pas përplasjeve të ashpra mes protestuesve dhe agjentëve federalë pranë një qendre të Emigracionit në Portland. Gjyqtarja Karin J. Immergut vendosi që administrata nuk mund të dërgojë nën kontroll federal trupa të Gardës Kombëtare nga asnjë shtet për në Oregon, duke përfshirë edhe rreth 200 trupa që ishin urdhëruar të zhvendoseshin nga Kalifornia.
Guvernatorët Gavin Newsom (Kaliforni) dhe Tina Kotek (Oregon) ishin ndër zyrtarët që reaguan ashpër ndaj urdhrave të Trump, duke e akuzuar atë për “abuzim me pushtetin”. Edhe guvernatori i Illinois, JB Pritzker, deklaroi se do të padisë administratën pas njoftimit se 400 trupa nga Teksasi do të dërgoheshin në shtetin e tij.
Zyra e Presidentit Trump ka argumentuar se trupat nevojiten për të mbrojtur objektet dhe stafin e Emigracionit dhe Doganave (ICE), ndërsa Gjykata e Apelit po shqyrton ligjshmërinë e këtyre dislokimeve. Ndërkohë, gjyqtarja Immergut ka vlerësuar se presidenti ndoshta ka tejkaluar kompetencat kushtetuese dhe ka shkelur Amendamentin e Dhjetë të Kushtetutës.
Përplasjet kanë përfshirë edhe qytete të tjera si Çikago, ku është raportuar për përdorim force nga agjentë federalë, përfshirë një incident me të shtëna ndaj një gruaje që sipas autoriteteve ishte e armatosur. Aktivistët dhe zyrtarët lokalë kanë akuzuar administratën për përhapje të frikës dhe propagandës, duke përshkruar situatën si një “pushtim”.
Administrata Trump ka intensifikuar përdorimin e agjentëve federalë në qytete të mëdha në prag të zgjedhjeve, duke u përballur me kritika të ashpra për taktikat e përdorura, përfshirë arrestimet nga agjentë me maska dhe pa identifikim të qartë.
