SHARM EL-SHEIKH, 13 tetor 2025 — Presidenti amerikan Donald Trump mbërriti të hënën në Sharm el-Sheikh të Egjiptit, ku mori pjesë në një samit të udhëheqësve botërorë për të diskutuar të ardhmen e Gazës. Në krah të presidentit egjiptian Abdel Fatah El-Sisi, Trump deklaroi se ka ardhur koha për të nisur “Fazën 2” të një marrëveshjeje më të gjerë paqeje në Lindjen e Mesme.
Më herët gjatë ditës, në një fjalim para Parlamentit izraelit për të shënuar kthimin e pengjeve të mbetur gjallë nga Gaza si pjesë e një marrëveshjeje armëpushimi të mbështetur nga SHBA, Trump shpalli se “lufta në Gaza ka përfunduar”, duke e quajtur momentin “agimin e një Lindjeje të Mesme të re”. Megjithatë, mbetet ende e paqartë se si do të zhvillohet faza e ardhshme e planit të paqes.
Sipas autoriteteve izraelite, 20 pengje të mbetura gjallë u liruan në dy grupe — fillimisht shtatë dhe më pas trembëdhjetë — dhe tashmë janë kthyer në Izrael. Në këmbim, Izraeli liroi rreth 2,000 të burgosur dhe të ndaluar palestinezë, shumica e të cilëve janë banorë të Gazës të arrestuar gjatë dy viteve të fundit pa u ngritur akuza kundër tyre.
Zyrtarë palestinezë dhe aktivistë të të drejtave të njeriut kanë shprehur shqetësimin se, pas lirimit të pengjeve — të vetmin mjet presioni të Hamasit — ushtria izraelite mund të rifillojë operacionet ushtarake në Rripin e Gazës.
Presidenti Trump, megjithatë, ka ofruar garanci personale se Izraeli nuk do të rikthehet në sulme dhe se përpjekjet diplomatike do të përqendrohen në “ndërtimin e një paqeje të qëndrueshme për të dy popujt”.
Sipas burimeve nga samiti, liderët pritet të diskutojnë krijimin e një mekanizmi ndërkombëtar për rindërtimin e Gazës dhe garantimin e sigurisë në rajon, me pjesëmarrjen e SHBA-së, Egjiptit, Jordanisë dhe disa vendeve evropiane.
