Presidenti ukrainas Volodymyr Zelensky pritet të takohet me presidentin e SHBA-së, Donald Trump në Uashington të premten.
Takimi po ndodh në kohën kur Trump do të shqyrtojë nëse do ta pajisë Ukrainën me raketa Tomahawk të afta të godasin thellë në Rusi.
Takimi i tyre vjen një ditë pasi Trump tha se ishte arritur “përparim i madh” gjatë një telefonate me presidentin rus Vladimir Putin, me të cilin palët ranë dakord të zhvillonin bisedime ballë për ballë në Hungari.
Trump tha se telefonata, e para me Putinin që nga mesi i gushtit, ishte “shumë produktive”, duke shtuar se ekipet nga Uashingtoni dhe Moska do të takohen javën e ardhshme.
Ndërsa Zelensky mbërriti në SHBA, vizita e tij e tretë që nga janari, ai tha se Moska po “nxitonte të rifillonte dialogun sapo të dëgjonte për Tomahawkët”.
Zelensky i ka bërë thirrje SHBA-së që t’i sigurojë Ukrainës raketat e përparuara, të cilat kanë një rreze veprimi prej 2,500 km (1,500 milje).
Duke shkruar në platformën e tij “Truth Social” pas përfundimit të telefonatës me Putinin, Trump tha se ai dhe presidenti rus “kaluan shumë kohë duke folur për tregtinë midis Rusisë dhe Shteteve të Bashkuara kur të mbaronte lufta me Ukrainën”.
Ai tha se “këshilltarët e nivelit të lartë” nga të dy vendet do të takohen në një vend të paspecifikuar javën e ardhshme, me Sekretarin e Shtetit Marco Rubio që do të kryesojë delegacionin amerikan.
Trump tha gjithashtu se do ta informonte Zelenskyn mbi bisedimet e tij me Putinin të premten. “Unë besoj se është bërë përparim i madh me bisedën telefonike të sotme”.
Ai më vonë u tha gazetarëve se priste të takohej me Putinin në Hungari “brenda dy javësh”.
Kryeministri hungarez Viktor Orban, i tha radios shtetërore se do të flasë me presidentin rus më vonë të premten.
“Meqenëse BE-ja është pro luftës, është logjike që ajo të lihet jashtë këtij procesi paqeje”, tha ai.
Takimi i planifikuar në Budapest ishte “një lajm i shkëlqyer për njerëzit paqedashës të botës”, shkroi Orban në X të enjten, dhe shtoi se kishte folur me Trumpin në telefon.
“Paqja kërkon durim, forcë dhe përulësi. Evropa duhet të ndryshojë qëndrimin e saj. Në vend të arrogancës dhe ndezjes së flakëve të luftës së pafundme, ne kemi nevojë për negociata me Rusinë. Vetëm dialogu mund të sjellë paqe në kontinentin tonë”.
Disa orë para telefonatës Trump-Putin, Rusia nisi një nga sulmet e saj më të mëdha të vitit ndaj Ukrainës, duke përfshirë 28 raketa balistike dhe 320 dronë, sipas ambasadores së Ukrainës në SHBA, Olga Stefanishyna.
Stefanishyna tha se nisja e sulmeve ajrore të Rusisë gjatë natës në Ukrainë përpara thirrjes telefonike “zbulon qëndrimin e vërtetë të Moskës ndaj paqes”.
