Turma të mëdha njerëzish kanë marrë pjesë në protestat “Pa Mbretër” kundër politikave të pPresidentit Donald Trump në qytete anembanë SHBA-së, duke përfshirë Nju Jorkun, Uashington DC, Çikagon, Miamin dhe Los Anxhelosin.
Mijëra njerëz mbushën sheshin ikonik Times Square të qytetit të Nju Jorkut dhe rrugët përreth, derisa mbanin pankarta me slogane si “Demokraci jo Monarki” dhe “Kushtetuta nuk është opsionale”.
Përpara demonstratave, aleatët e Trump akuzuan protestuesit se ishin të lidhur me lëvizjen e ekstremit të majtë Antifa dhe dënuan atë që ata e quajtën “tubimi kundër urrejtjes së Amerikës”.
Disa shtete amerikane kishin mobilizuar Gardën Kombëtare. Por organizatorët thanë se ngjarjet ishin paqësore.
Që kur u kthye në Shtëpinë e Bardhë në janar, Trump ka zgjeruar fushëveprimin e pushtetit presidencial, duke përdorur urdhra ekzekutivë për të çmontuar pjesë të qeverisë federale dhe për të vendosur trupa të Gardës Kombëtare në qytetet e SHBA-së, pavarësisht kundërshtimeve nga guvernatorët e shteteve.
Ai gjithashtu u ka bërë thirrje zyrtarëve më të lartë të zbatimit të ligjit të administratës që të ndjekin penalisht armiqtë e tij të dyshuar.
Presidenti thotë se veprimet e tij janë të nevojshme për të rindërtuar një vend në krizë dhe i ka hedhur poshtë akuzat se ai po sillet si diktator ose fashist, duke i quajtur histerike.
Por kritikët paralajmërojnë se disa nga lëvizjet e administratës së tij janë jokushtetuese dhe një kërcënim për demokracinë amerikane.
Në Nju Jork, pjesë të turmës shpërthenin rregullisht në thirrjet “Kështu duket demokracia”, ndërsa një tingull pothuajse i vazhdueshëm daulleje buçiste në sfond.
Helikopterë dhe dronë u panë duke fluturuar sipër protestuesve dhe policia qëndronte në anë të rrugës.
Departamenti i Policisë së Nju Jorkut tha se më shumë se 100,000 njerëz ishin mbledhur në të pesë lagjet e qytetit dhe se nuk u bënë arrestime në lidhje me protestën.
Në Times Square, një oficer policie që ishte në afërsi vlerësoi se mbi 20,000 persona po marshonin në Avenue-n e 7-të.
