Nuk ka “asnjë plan” që Presidenti i SHBA-së, Donald Trump, të takohet me Presidentin e Rusisë, Vladimir Putin, “në të ardhmen e afërt”, deklaroi një zyrtar i Shtëpisë së Bardhë.
Të enjten e kaluar, Trump tha se presidentin rus do të zhvillojë bisedime në Budapest brenda dy javësh për të diskutuar luftën në Ukrainë.
Një takim përgatitor midis Sekretarit të Shtetit të SHBA-së, Marco Rubio, dhe homologut të tij rus, Sergei Lavrov, ishte planifikuar të mbahej këtë javë, por Shtëpia e Bardhë tha se të dy kishin pasur një telefonatë “produktive” dhe se një takim nuk ishte më “i nevojshëm”.
Mirëpo, Shtëpia e Bardhë, nuk dha më shumë detaje se pse bisedimet ishin pezulluar.
Por dallimet kryesore midis propozimeve të SHBA-së dhe parakushteve të Rusisë për paqe u bënë gjithnjë e më të qarta këtë javë dhe duket se kanë shuar shanset për një samit midis dy presidentëve.
Trump kishte diskutuar në telefon me Putinin për një samit në Budapest, një ditë para se të takohej me homologun e tij ukrainas, Volodymyr Zelensky, në Shtëpinë e Bardhë.
Disa raportime sugjeruan se bisedimet e tij me Zelenskyn kishin qenë një “ndeshje me britma”, me burime që sugjeronin se Trump e kishte shtyrë atë të hiqte dorë nga zona të mëdha territori në rajonet lindore të Donetskut dhe Luhanskut, të njohura si Donbas, si pjesë e një marrëveshjeje me Rusinë.
Megjithatë, Zelensky ka thënë gjithmonë se Ukraina nuk mund të heqë dorë nga pjesët e Donbasit që ende i mban, me arsyetimin se Rusia më vonë mund ta përdorë zonën si një trampolinë për sulme të mëtejshme.
Të hënën, Trump përkrahu një propozim për armëpushim të mbështetur nga Kievi dhe udhëheqësit evropianë për të ngrirë konfliktin në vijën aktuale të frontit.
Rusia ka kundërshtuar vazhdimisht ngrirjen e vijës aktuale të kontaktit.
Të martën, udhëheqësit evropianë dolën me një deklaratë me Zelenskyn duke thënë se çdo bisedë për t’i dhënë fund luftës në Ukrainë duhet të fillojë me ngrirjen e vijës aktuale të frontit dhe akuzuan Rusinë se nuk është “serioze” për paqen.
Trump dhe Putin u takuan për herë të fundit në Alaska në gusht gjatë një samiti të organizuar me nxitim, i cili nuk dha rezultate konkrete.
