Presidenti i SHBA-së, Donald Trump, ka mbikëqyrur nënshkrimin e një marrëveshjeje të zgjeruar armëpushimi midis Tajlandës dhe Kamboxhias, të cilën ai e ndihmoi të negociohej këtë verë për të zgjidhur mosmarrëveshjen e tyre kufitare.
Ceremonia u zhvillua menjëherë pasi Trump mbërriti në kryeqytetin e Malajzisë, Kuala Lumpur, për samitin e ASEAN të dielën, në atë që ai e përshkroi si një “ditë të rëndësishme”.
“Pati shumë vrasje. Dhe pastaj i ndaluam, shumë shpejt”, tha ai përpara se kryeministri kamboxhian Hun Manet dhe kryeministri tajlandez, Anutin Charnvirakul të nënshkruanin marrëveshjen.
“Ne bëmë diçka që shumë njerëz thanë se nuk mund të bëhej”, tha Trump.
Manet e quajti atë një “ditë historike” dhe Charnvirakul tha se marrëveshja krijon “gurët themelorë për një paqe të qëndrueshme”.
Marrëveshja e armëpushimit kërkon që Tajlanda të lirojë 18 ushtarë kamboxhianë të robëruar dhe që të dy vendet të fillojnë tërheqjen e armëve të rënda nga kufiri.
Presidenti amerikan tha se kishte nënshkruar marrëveshje ekonomike me të dy vendet dhe ishte planifikuar të finalizonte një marrëveshje tregtare me Malajzinë më vonë gjatë ditës.
Gjatë Samitit të ASEAN-it, udhëheqësit rajonalë pritet të punojnë për stabilizimin e lidhjeve me SHBA-në.
Kuala Lumpur është ndalesa e parë e udhëtimit njëjavor të zotit Trump në rajon, i cili përfshin gjithashtu vizita në Japoni dhe Korenë e Jugut.
Kjo përfshin një takim me Presidentin Kinez Xi Jinping në kuadër të samitit të APEC-ut në Korenë e Jugut.
