Më shumë se 60,000 persona kanë ikur nga qyteti sudanez el-Fasher, i cili u pushtua nga Forcat paraushtarake të Mbështetjes së Shpejtë (RSF) gjatë fundjavës, njoftoi agjencia e OKB-së për refugjatët.
Ka pasur raportime për ekzekutime masive dhe krime kundër njerëzimit, ndërsa luftëtarët e RSF-së sulmuan qytetin pas një rrethimi 18-mujor të shënuar nga uria dhe bombardimet e rënda.
Fluksi i atyre që po iknin nga dhuna drejt qytetit Tawila, rreth 80 km në perëndim të el-Fasher, ishte rritur gjatë ditëve të fundit, tha për BBC-në, Eujin Byun i UNHCR-së.
Ai tha se popullata ka raportuar histori të tmerrshme mizorish, përfshirë përdhunime, dhe agjencia po luftonte për të gjetur strehim dhe ushqim të mjaftueshëm për to, tha ajo.
Vlerësohet se më shumë se 150,000 njerëz janë ende të bllokuar në el-Fasher, i cili kishte qenë bastioni i fundit i ushtrisë në rajonin perëndimor të Darfurit.
RSF ka mohuar akuzat e përhapura gjerësisht se vrasjet në el-Fasher janë të motivuara etnikisht dhe ndjekin një model të paraushtarakëve arabë që synojnë popullatat joarabe.
Por RSF ka ndaluar një nga milicët e saj, Abu Lulu, i cili është akuzuar për ekzekutime të shpejta.
Grupi ndau pamjet që tregonin arrestimin e luftëtarit pasi BBC Verify e identifikoi atë si përgjegjës për ekzekutimin e disa burrave të paarmatosur pranë el-Fasher.
TikTok i ka konfirmuar BBC-së se ka ndaluar llogarinë e lidhur me Lulu-n.
Sudani u zhyt në një luftë civile në prill të vitit 2023, pasi shpërtheu një luftë e ashpër për pushtet midis ushtrisë së tij dhe RSF-së.
Kjo ka çuar në një zi buke dhe pretendime për gjenocid në rajonin perëndimor të Darfurit.
Më shumë se 150,000 njerëz kanë vdekur në konfliktin në të gjithë vendin dhe rreth 12 milionë të tjerë kanë ikur nga shtëpitë e tyre në atë që OKB-ja e ka quajtur krizën më të madhe humanitare në botë.
