Rusia mund të sulmojë territorin e NATO-s në një mënyrë të kufizuar në çdo kohë, ka paralajmëruar një zyrtar i lartë ushtarak gjerman.
“Nëse shikoni aftësitë aktuale dhe fuqinë luftarake të Rusisë, ajo mund të nisë një sulm në shkallë të vogël kundër territorit të NATO-s që nesër. I vogël, i shpejtë, i kufizuar në rajon, asgjë e madhe – Rusia është shumë e lidhur në Ukrainë për këtë”, tha gjenerallejtënant Alexander Sollfrank.
Ai kryeson komandën e operacioneve të përbashkëta të Gjermanisë dhe mbikëqyr planifikimin e mbrojtjes.
I njëjti përsëriti paralajmërimet e NATO-s se Rusia mund të nisë një sulm në shkallë të gjerë ndaj aleancës me 32 anëtarë që në vitin 2029.
Nga ana tjetër Vladimir Putin, mohon planet për këtë qëllim, duke këmbëngulur se pushtimi në shkallë të plotë i Ukrainës nga Moska ishte në fakt në mbrojtje kundër zgjerimit të NATO-s.
Pavarësisht pengesave në luftën në Ukrainë, Sollfrank tha se forca ajrore e Rusisë është ende e fortë dhe forcat e saj bërthamore dhe raketore nuk janë prekur.
“Ndërsa Flota e Detit të Zi ka pësuar humbje të konsiderueshme, flotat e tjera ruse nuk janë zvogëluar. Forcat tokësore po pësojnë humbje, por Rusia thotë se synon të rrisë numrin e përgjithshëm të trupave të saj në 1.5 milion ushtarë. Dhe Rusia ka mjaftueshëm tanke kryesore beteje për të bërë të mundur një sulm të kufizuar që nesër”, shtoi ai
“Por ka tre faktorë që do të përcaktojnë nëse Rusia do të vendosë të sulmojë apo jo.
Këto janë:
Fuqia ushtarake e Rusisë
historiku i saj ushtarak
dhe udhëheqja e saj
Këta tre faktorë më çojnë në përfundimin se një sulm rus është në sferën e të mundshmes. Nëse do të ndodhë apo jo, varet në një masë të madhe nga sjellja jonë”, tha ai.
