Një gjykatë apeli në Paris ka vendosur të lirojë nga burgu ish-presidentin francez Nicolas Sarkozy dhe ta vërë atë nën mbikëqyrje gjyqësore.
Sarkozy pritet të dalë nga burgu më vonë të hënën, më pak se tri javë pasi filloi të vuante një dënim pesëvjeçar për konspiracion kriminal në një skemë për të financuar fushatën e tij të suksesshme zgjedhore të vitit 2007 me fonde nga Libia.
Ai u lirua nga të gjitha akuzat e tjera, përfshirë korrupsionin dhe marrjen e financimit të paligjshëm të fushatës.
Dënimi me burg i Sarkozisë u zbatua menjëherë për shkak të “seriozitetit të jashtëzakonshëm” të krimit, i tha gjykatës gjyqtarja Nathalie Gavarino.
Sarkozisë do t’i ndalohet të largohet nga territori francez, tha gjykata. Një gjyq i apelit pritet të zhvillohet më vonë.
“Rreziqet e bashkëpunimit dhe presionit mbi dëshmitarët justifikojnë kërkesën për lirim nën mbikëqyrje gjyqësore”, tha prokurori Damien Brunet në gjykatë, duke kërkuar që kërkesa e Sarkozisë për lirim të miratohet.
Sarkozi, 70 vjeç, u bë ish-kreu i parë i shtetit francez në kohët moderne që u dërgua pas hekurave pas dënimit të tij më 25 shtator. Ai u burgos më 21 tetor në pritje të apelit, por menjëherë kërkoi lirim të parakohshëm.
Ish-presidenti, i cili qeverisi nga viti 2007 deri në vitin 2012, mohon të ketë bërë ndonjë shkelje dhe thotë se është viktimë e një “komploti” të lidhur me ish-udhëheqësin libian Muamar Gadafi.
