Demokratët publikuan të mërkurën email-e, të cilat sipas tyre ngritën pyetje të reja rreth marrëdhënies së presidentit Donald Trump me autorin e dënuar të krimit seksual, Jeffrey Epstein dhe sa shumë dinte ai për abuzimin e tij me vajzat e mitura – një zbulim që Trump e kritikoi si një përpjekje për të larguar vëmendjen nga mbyllja e qeverisë.
Demokratët publikuan mesazhe midis Epstein dhe autorit Michael Wolff dhe Ghislaine Maxwell. Kjo e fundit po vuan një dënim me 20 vjet burg për akuza që lidhen me rolin e saj në lehtësimin e trafikimit seksual të Epstein. Në një e-mail të vitit 2019 drejtuar Wolff, Epstein shkroi se Trump “dinte për vajzat”, megjithëse nuk ishte e qartë se çfarë do të thoshte kjo frazë.
Zbulimi u bë në ditën kur një anëtar i ri demokrat është planifikuar të betohet në Dhomën e Përfaqësuesve, një veprim që pritet të jetë një pikë kthese në një fushatë për të detyruar një votim për publikimin e të gjitha dosjeve jo të klasifikuara që lidhen me Epstein, duke ringjallur interesin në një rast që ka qenë një dhimbje koke e madhe politike për Trump.
Grupi i e-mail-eve përfshin një mesazh të vitit 2011 drejtuar Maxwell, në të cilin Epstein e përshkroi Trumpin si “ai qen që nuk ka lehur”, duke shtuar se Trump kishte “kaluar orë të tëra në shtëpinë time” me një nga viktimat e tij, emri i së cilës është i redaktuar.
Trump ka mohuar me forcë dhe vazhdimisht se ka qenë në dijeni të trafikimit seksual të Epstein. Ai ka thënë se ai dhe Epstein, i cili vdiq nga vetëvrasja në një qeli burgu në Manhattan në vitin 2019, dikur ishin miq përpara se të grindeshin.
Trump të mërkurën akuzoi demokratët se publikuan email-et për të larguar vëmendjen nga mbyllja 43-ditore e qeverisë federale, më e gjata në historinë amerikane.
“Demokratët po përpiqen ta ngrenë përsëri në vëmendje mashtrimin e Jeffrey Epstein, sepse do të bëjnë gjithçka për të shmangur vëmendjen se sa keq kanë dalë gjatë periudhës së mbylljes së qeverisë dhe shumë temave të tjera”, shkroi Trump në platformën e tij Truth Social të mërkurën pasdite.
Në një konferencë të mëparshme informative, sekretarja e shtypit e Shtëpisë së Bardhë, Karoline Leavitt, akuzoi demokratët për redaktimin e emrit të viktimës në e-mail-et e publikuara sepse viktima ishte Virginia Giuffre, e cila vdiq nga vetëvrasja në prill dhe e kishte quajtur Trumpin miqësor pa e akuzuar atë për ndonjë shkelje në kujtimet e saj pas vdekjes.
“Këto email-e nuk vërtetojnë absolutisht asgjë tjetër përveç faktit se Presidenti Trump nuk bëri asgjë të gabuar”, tha Leavitt.
Rasti Epstein e ka ndjekur Trumpin për muaj të tërë, duke i shqetësuar edhe mbështetësit e tij politikë, të cilët besojnë se qeveria ka mbuluar lidhjet e Epsteinit me të pasurit dhe të fuqishmit, dhe kanë qenë jashtëzakonisht kritikë ndaj Departamentit të Drejtësisë për mospublikimin e më shumë informacioneve rreth rastit Epstein.
Vetëm katër në 10 republikanë thanë në një sondazh të Reuters/Ipsos në tetor se e miratonin mënyrën se si Trump i trajtoi dosjet Epstein – shumë më poshtë se nëntë në 10 që e miratojnë performancën e tij të përgjithshme në Shtëpinë e Bardhë.
