Shteti dhe Republika triumfuan përballë grupeve ekstremiste dhe terroriste që mbështetjen e financimin e gjejnë te Beogradi zyrtar, e inspirimin dhe metodat i gjejnë te Rusia.
Kështu vlerësoi kryeministri në detyrë, Albin Kurti, teksa ka kujtuar sot njëvjetorin e sulmit terrorist ndaj akuaduktit të Ibër Lepencit në Varagë të Zubin Potokut, një prej më të rëndëve ndaj infrastrukturës kritike të vendit.
Nëpërmjet një postimi në Facebook, Kurti ka rikujtuar se akuadukti ishte goditur me eksploziv më 27 nëntor të vitit të kaluar, rreth orës 19:00, duke rrezikuar furnizimin me ujë të një zinxhiri komunash dhe funksionimin e Termocentralit “Kosova B”.
Ai ka thënë se objektivi i sulmuesve ishte krijimi i një krize të gjerë, përfshirë uljen drastike të kapaciteteve prodhuese të energjisë, ndërprerjen e shërbimeve të ngrohtores qendrore në kryeqytet dhe dëmtimin e rëndë të infrastrukturës telekomunikuese.
“Reagimi institucional ishte i menjëhershëm dhe kritik në parandalimin e pasojave katastrofike që kishte për qëllim sulmi: uljen për 60% të kapaciteteve prodhuese të energjisë elektrike, ndërprerjen e furnizimit me ujë për komunën e Mitrovicës, Skenderajt, Drenasit, Vushtrrisë, Fushë Kosovës dhe gjysmës së Prishtinës, ndërprerjen e shërbimeve të ngrohtores qendrore në kryeqytet dhe përgjysmimin e kapaciteteve telekomunikuese në vend si pasojë e mungesës së energjisë elektrike në stacionet bazë. Veprimet profesionale dhe të suksesshme të institucioneve siguruan që, përkundër dëmit fizik dhe përgjatë gjithë procesit të riparimit, të ketë rrjedhje të mjaftueshme të ujit për ftohjen e termoelektranave dhe mirëmbajtjen e prodhimit të energjisë elektrike, si dhe furnizim me ujë të pijshëm për banorët e komunave të prekura”, ka shkruar Kurti.
Ai rikujtoi se në afat rekord prej vetëm një muaji akuadukti i dëmtuar u rindërtua dhe rrjedha e ujit bashkë me sistemin u rikthyen në kapacitete të plota operative.
“Përgjigjja jonë dëshmoi aftësinë e lartë reaguese të ndërmarrjeve publike dhe institucioneve shtetërore. Pas bastisjeve në veri të Kosovës, në lidhje me këtë sulm, ishin konfiskuar armë, uniforma dhe pajisje të ndryshme, si dhe ishin gjetur emblema ruse dhe serbe të strukturave të inteligjencës, ushtrisë dhe sigurisë. Edhe sot, ato janë dëshmi të qarta për përfshirjen e grupeve ekstremiste dhe terroriste serbo-ruse, me lidhje të forta në Serbi, që synim e kanë destabilizimin e vendit tonë dhe krijimin e një mjedisi të pasigurt në rajon”, ka nënvizuar Kurti.
