Ukraina ka rritur sulmet me dronë ndaj cisternave të naftës ruse.
Sulmi me dronë detarë ndaj Konsorciumit të Gazsjellësit Kaspik ishte një nga disa sulme ukrainase që tërhoqën vëmendjen gjatë fundjavës.
Vonë të premten dhe herët të shtunën, dronët detarë ukrainas goditën gjithashtu dy anije cisternash ruse në Detin e Zi.
Nga pamjet e publikuara, shihen dronët duke goditur tankerët të identifikuar si Kairos dhe Virat.
Një zyrtar në Shërbimin e Sigurisë së Ukrainës i tha Reuters se tankerët e sanksionuar po shkonin drejt një porti rus për t’u ngarkuar me naftë të destinuar për tregjet e huaja.
Moska është akuzuar për vendosjen e flotës në hije të cisternave pa shenja dalluese dhe shpesh të vjetra për të anashkaluar sanksionet mbi eksportet e saj të naftës, të cilat financojnë luftën.
“Kjo do t’i japë një goditje të konsiderueshme transportit rus të naftës”, tha zyrtari ukrainas.
Anija Kairos, 274 metra e gjatë, pësoi një shpërthim dhe u përfshi nga flakët ndërsa po udhëtonte nga Egjipti për në Rusi dje, tha ministria e transportit e Turqisë. Ekuipazhi i saj u evakuua nga anijet e shpëtimit, ndërsa përpjekjet për të shuar zjarrin vazhduan.
Anija Virat thuhet se u godit rreth 35 milje detare në det të hapur. Ajo u sulmua përsëri këtë mëngjes nga anije pa pilot, duke pësuar dëme të vogla në anën e djathtë mbi vijën e ujit, tha ministria turke.
Ministria tha se anija ishte në gjendje të qëndrueshme dhe ekuipazhi në gjendje të mirë shëndetësore.
Ndërkohë, gjatë natës është raportuar për sulme ruse mbi kryeqytetin ukrainas, derisa mediat vendëse kanë njoftuar për një person të vdekur.
Nga ana tjetër një delegacion ukrainas pas arritjes në SHBA, pritet të vazhdojë bisedimet për planin e paqes.
Presidenti ukrainas Volodymyr Zelenskyy ka njoftuar se ata do të vazhdojnë procesin e “përpunimit” të një versioni të përbashkët të planit të paqes të Trump, i cili fillimisht numëronte 28 pika dhe u kritikua në Evropë për favorizimin e madh të palës ruse.
Zelenskyy tha mbrëmë se diplomacia “mbetet aktive” dhe se SHBA-të po demonstrojnë një “qasje konstruktive”, që mund të shohë një plan veprimi të finalizuar “në ditët në vijim”.
Mediat kanë raportuar se zyrtarët ukrainas do të priten sot në Florida nga sekretari i shtetit i SHBA-së, Marco Rubio, i dërguari special i Donald Trump, Steve Witkoff dhe dhëndri i presidentit të SHBA-së, Jared Kushner.
Në fillim të javës së ardhshme, Witkoff pritet të vazhdojë bisedimet mbi këtë çështje me palën ruse në Moskë.
