Sekretari i Shtetit Marco Rubio tha të mërkurën se do të takohet me zyrtarë nga Danimarka javën e ardhshme për të biseduar në lidhje me Groenlandën.
Komentet e Rubios nga Capitol Hill erdhën ndërsa administrata Trump ka intensifikuar retorikën e saj për marrjen e Grenlandës, e cila është një territor vetëqeverisës i Danimarkës.
Ai u pyet pse administrata nuk e kishte pranuar kërkesën e Danimarkës për një diskutim rreth ishullit.
“Do të takohem me ta javën tjetër”, u përgjigj Rubio.
Rubio u pyet nga një gazetar nëse do të tërhiqte mundësinë e përdorimit të ushtrisë amerikane për të marrë kontrollin e Groenlandës.
“Nuk jam këtu për të folur për Danimarkën apo ndërhyrjen ushtarake”, tha Rubio, përpara se të përsëriste planet e tij për t’u takuar me zyrtarët danezë javën e ardhshme.
“Do të zhvillojmë biseda me ta atëherë, por nuk do të shtoj gjëra të tjera… për këtë sot”.
Të martën në mbrëmje, ministri danez i Mbrojtjes dhe Zëvendëskryeministri Troels Lund Poulsen tha se Danimarka do të shpenzonte 88 miliardë krona daneze (13.8 miliardë dollarë) për riarmatosjen e Groenlandës, duke pasur parasysh “situatën serioze të sigurisë në të cilën ndodhemi”.
“Shpresoj që Shtetet e Bashkuara ta njohin këtë fakt dhe të jenë të gatshme të bashkëpunojnë në interesin tonë të përbashkët në sigurinë e Arktikut”, tha Poulsen në një deklaratë.
“Sepse Danimarka do të donte të vazhdonte të ishte një aleat i Shteteve të Bashkuara”, tha ai. “Por kjo kërkon një gatishmëri të ndërsjellë për të treguar respekt dhe bashkëpunim”.
Komentet e Poulsen erdhën disa orë pasi Shtëpia e Bardhë i tha CNBC se Presidenti Donald Trump dhe këshilltarët e tij po shqyrtonin “një sërë opsionesh” për të blerë Groenlandën, të cilat potencialisht përfshinin një opsion ushtarak.
