Presidenti Volodymyr Zelensky u ka ofruar vendeve të Gjirit ekspertizën ukrainase për asgjësimin e dronëve iranianë, në shkëmbim të një armëpushimi njëmujor me Rusinë.
Në një lëvizje të papritur diplomatike, Volodymyr Zelensky ka shfrytëzuar përshkallëzimin e tensioneve me Iranin për të propozuar një marrëveshje që mund të ndryshojë rrjedhën e luftës katërvjeçare në Ukrainë. Gjatë bisedimeve në Emiratet e Bashkuara Arabe, lideri ukrainas ofroi trajnim dhe teknologji për neutralizimin e dronëve “Shahed”, të cilët Rusia i ka përdorur masivisht kundër qyteteve ukrainase që nga viti 2022.
Zelensky theksoi se Ukraina zotëron mbrojtjen ajrore më efektive në botë kundër këtyre mjeteve fluturuese, të fituar përmes betejave të përgjakshme. “Ata që ruajnë hapësirën tonë ajrore mund t’u mësojnë të tjerëve se si të mbrohen nga kërcënimet iraniane,” deklaroi ai, duke synuar një partneritet strategjik me vendet e Lindjes së Mesme.
Kushti kryesor i këtij bashkëpunimi është arritja e një armëpushimi njëmujor me Rusinë, diçka që nuk është realizuar kurrë në katër vite konflikt. Zelensky kërkon që liderët e Gjirit të ndërmjetësojnë me Vladimir Putinin për të ndalur sulmet, ndërkohë që ai shprehu shqetësimin se vëmendja e SHBA-së mund të zhvendoset plotësisht drejt Iranit, duke lënë pas dore furnizimet për Kievin.
Presidenti sqaroi se nëse arrihet marrëveshja, Ukraina do të ofrojë instruktorë dhe sisteme interceptimi në këmbim të raketave PAK-3. Megjithatë, ai mbetet i prerë: “Nëse lëshohen raketa drejt nesh, ne do të mbrojmë kombit tonë me çdo kusht.” Ky plan shihet si një përpjekje për të mbajtur Ukrainën relevante në një kohë kur vëmendja globale po zhvendoset drejt një vatre të re lufte.
