Ish-deputetja Donika Kadaj-Bujupi, Këshilltare e Presidentes, znj.Vjosa Osmani, ka publikuar një artikull të Fox News ku Presidentja Vjosa Osmani cilësohet si aleate e ngushtë e Donald Trump, duke i dërguar një mesazh të tërthortë Albin Kurtit.
Donika Kadaj-Bujupi ka trazuar ujërat politike duke shpërndarë një shkrim të medias prestigjioze amerikane, Fox News. Në këtë artikull, i cili bën fjalë për krizën kushtetuese në Kosovë, Presidentja Vjosa Osmani përshkruhet me epitete të fuqishme, duke u etiketuar si “aleate e Presidentit Donald Trump”.
Ky postim i Kadaj-Bujupit vjen si një “selam” i qartë për Kryeministrin Albin Kurti, duke vënë në pah mbështetjen dhe imazhin që Osmani gëzon në qarqet e administratës së re amerikane. Sipas Fox News, Osmani ka marrë hapa vendimtarë për shpërndarjen e parlamentit dhe shpalljen e zgjedhjeve të parakohshme.
Në kontekstin e zhvillimeve në Kosovë, ky cilësim nga media e afërt me Trump-in shihet si një rritje e peshës politike të Osmanit karshi partnerëve ndërkombëtarë. Ish-deputetja e ka shoqëruar postimin me një emoji të fitores, duke vulosur mesazhin e saj për fuqinë e Presidentes.
Analistët e shohin këtë si një shenjë të qartë se ekuilibrat e brendshëm po ndryshojnë, sidomos kur bëhet fjalë për marrëdhëniet me SHBA-në. Ndërkohë që Qeveria Kurti shpesh është kritikuar për raporte të ftohta me Uashingtonin, Osmani po portretizohet si “ura” kryesore e komunikimit.
Ky zhvillim pritet të nxisë debate të reja në skenën politike, duke parë se si do të pozicionohet Kryeministri pas këtij lartësimi publik të Presidentes nga ana e mediave më me ndikim në botë.
