Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, dhe kryetari i Komunës së Mitrovicës, Faton Peci, kanë nënshkruar aneks-marrëveshjen për ndërtimin e Parkut Industrial të gjelbër në Frashër të Vogël të Mitrovicës, projekt që parashihet të kapë vlerën e rreth 1 milion eurove.
Gjatë vizitës në Mitrovicë, ministrja Kusari-Lila theksoi se ky qytet ka potencial të madh për zhvillim industrial dhe inovacion.
“Qyteti i Mitrovicës ka potencial të madh për t’u shndërruar në një qendër të rëndësishme të zhvillimit industrial dhe inovacionit në vend”, ka thënë Kusari-Lila.
Sipas saj, zhvillimi i Parkut Industrial në Frashër të Vogël do të jetë një projekt pilot për krijimin e një Eco-Industrial Parku, i cili pritet të tërheqë industri përpunuese dhe investime të reja.
“Ky park do të ndërtohet sipas standardeve moderne mjedisore dhe me sektorë industrialë të specializuar, në përputhje me kërkesat e tregut evropian”, ka theksuar ajo.
Projekti parashihet të përfundojë brenda një viti, ndërsa Komuna e Mitrovicës dhe ministria përkatëse do të krijojnë një bord të përbashkët për përzgjedhjen e industrive përpunuese që do të vendosen në Parkun Industrial të Frashërit të Vogël.
Gjatë takimit mes ministres Mimoza Kusari-Lila dhe kryetarit Faton Peci, është diskutuar edhe për projektin e impiantit të trajtimit të ujërave të zeza, i cili pritet të nisë së shpejti me mbështetje nga International Bank for Reconstruction and Development.
Ky projekt synon të kontribuojë në mbrojtjen e mjedisit dhe përmirësimin e infrastrukturës së qytetit.
Në takim u diskutua gjithashtu edhe për zhvillimin e kapitalit njerëzor përmes krijimit të një qendre inovacioni për të rinjtë dhe forcimit të arsimit dual, me qëllim përgatitjen e profesionistëve për tregun e punës.
Ministrja Kusari-Lila theksoi se do të intensifikohet edhe inspektimi dhe digjitalizimi i raportimit të shkeljeve përmes bashkëpunimit të Inspektoratit Qendror me rajonin e Mitrovicës.
