Për herë të parë që nga viti 2023, forcat ukrainase kanë rimarrë më shumë territor sesa kanë humbur, duke thyer moralin e ushtrisë ruse dhe duke bllokuar ofensivën e planifikuar të Kremlinit për vitin 2026.
Ukraina ka arritur një fitore strategjike që po ndryshon rrjedhën e historisë. Sipas raportit të fundit nga Instituti për Studimin e Luftës (ISW), forcat e Kievit kanë çliruar të paktën 257 kilometra katrorë që nga fillimi i vitit 2026, duke shënuar herën e parë në tri vite që territori i fituar tejkalon atë të humbur.
Presidenti Volodymyr Zelensky shkoi edhe më tej, duke deklaruar për mediat italiane se shifra reale e tokës së çliruar ka arritur në 460 kilometra katrorë. Kjo përparësi është arritur falë diversifikimit të luftës me dronë dhe teknologji të re, ndërkohë që Rusia po pëson humbje katastrofike deri në 35,000 ushtarë në muaj.
Në terren, suksesi është i dukshëm. Major Gjeneral Oleksandr Komarenko njoftoi se rajoni i Dnipropetrovskut është pothuajse tërësisht nën kontrollin e Kievit. Brigadat mekanizuara kanë goditur rëndë përpjekjet e Kremlinit për të krijuar zona “buffer”, duke i detyruar rusët të tërhiqen në pozicione mbrojtëse.
Kjo kundërofensivë e lokalizuar ka gjeneruar efekte strategjike që kanë “paralizuar” planet e Rusisë për sulmin e madh të pranverë-verës 2026. Analistët e ISW vlerësojnë se Moska mund të detyrohet të braktisë plotësisht operacionet në Zaporizhzhia dhe Donetsk për shkak të dëmeve të pariparueshme në mjetet e tyre luftarake.
Ndonëse fronti mbetet kompleks dhe me vija jo-kontinuale, suksesi i fundit ka treguar se Ukraina po e fiton betejën e konsumit. Përballë këtij realiteti, Moska po humb aftësinë për të diktuar kushtet e konfliktit, duke u detyruar të kalojë në një mbrojtje të dëshpëruar për të ruajtur pikat kyçe.
