Komuna e Prishtinës ka njoftuar se do të shtojë frekuencën e nisjeve në linjën 1A (Aeroport – Prishtinë dhe anasjelltas), për të përballuar fluksin e madh të udhëtarëve me rastin e ndeshjes së „play-off“-it për Kupën e Botës, Kosovë – Turqi.
Përmes një njoftimi zyrtar, Komuna bëri të ditur se në bashkëpunim me ndërmarrjen „Trafiku Urban“, ky plan special do të jetë në fuqi më 31 mars dhe 1 prill, si përgjigje ndaj rritjes së kërkesës për qarkullim nga ana e tifozëve dhe qytetarëve.
„Nisjet do të realizohen çdo një orë, nga ora 06:00 deri në 24:00, nga Aeroporti Ndërkombëtar i Prishtinës ‘Adem Jashari’ dhe nga Stacioni i Autobusëve në Prishtinë“, thuhet në njoftimin e Komunës.
Ky vendim synon të lehtësojë transportin e bashkëatdhetarëve dhe adhuruesve të futbollit që vijnë nga jashtë vendit për të ndjekur sfidën vendimtare të „Dardanëve“ në stadiumin „Fadil Vokrri“.
