Kombëtarja e Kosovës nuk arriti të kualifikohej në Kampionatin Botëror, pasi u mposht minimalisht në stadiumin „Fadil Vokrri“ nga Turqia. Dëshpërimi ishte i dukshëm në fytyrat e futbollistëve dhe tifozëve, por ndeshja e mbrëmshme ka bërë jehonë të madhe në mediat ndërkombëtare.
Një artikull të veçantë dhe tejet emocionues i ka kushtuar gazeta prestigjioze britanike, The Guardian, e cila përshkroi me detaje momentet e fundit të sfidës dhe atmosferën elektrizuese në Prishtinë.
“Rrëzimi” pas sinjalit të fundit Sipas The Guardian, kur Kosovës iu shterën mundësitë e fundit, lojtarët u rrëzuan në tokë njëherësh. Ata e kishin çuar Turqinë deri në fund, duke shpenzuar çdo pikë djerse për një perspektivë që dikur dukej e paimagjinueshme.
“Emocionet ishin dërrmuese. Lumbardh Dellova po përpiqej t’i fshehte lotët, ndërsa Edon Zhegrova, i cili ndezi lojën pasi hyri nga banka rezervë, u bëri shenjë bashkëlojtarëve të përballeshin me tifozët. Ata nuk kishin asgjë për t’u frikësuar; u larguan mes duartrokitjeve të një turme që i lejoheshin fantazitë më marramendëse”, shkruan artikulli.
Turqia thyen tersin 24-vjeçar Nga ana tjetër, Turqia festoi përballë 700 tifozëve të saj udhëtues, duke thyer një ters të gjatë. Që nga viti 2002, kur përfunduan të tretët në Botërorin e Japonisë dhe Koresë, turqit kishin dështuar radhazi të kualifikoheshin. Ata u rikthyen falë golit të Kerem Aktürkoğlu, por artikulli nënvizon se në një ditë tjetër, ata mund të kishin humbur ndaj një Kosove që dha gjithçka.
“Po të mos ishte devijuar në mënyrë brilante në traversë goditja e Fisnik Asllanit nga Uğurcan Çakır, vala e euforisë mund t’i kishte çuar ‘Dardanët’ përtej vijës së finishit. Ngushëllimi është se kjo nuk do të jetë përpjekja e fundit për një shtet të ri, linja e prodhimit të të cilit po rritet”, vëren The Guardian.
Muriqi i shkatërruar, Foda optimist Kapiteni Vedat Muriqi, një figurë luftarake gjatë gjithë ndeshjes, u shfaq i dërrmuar pas takimit: “Më vjen keq për ekipin dhe gjithë vendin. Jam krenar për lojtarët dhe veten, por fati nuk e deshi”.
Pavarësisht dhimbjes, përzgjedhësi Franco Foda mbetet besimplotë. “E ardhmja është e ndritur. Nuk jam i shqetësuar për këtë ekip, po ecim në drejtimin e duhur dhe së shpejti do të arrijmë potencialin tonë të plotë”, deklaroi trajneri gjerman.
Artikulli përfundon me një konstatim të fuqishëm: Edhe pse ëndrra e tyre u zbeh mbrëmë, rrallëherë një vend është ndier më i gjallë se Kosova në këtë rrugëtim.
