Ministri i Financave, Punës dhe Transfereve, Hekuran Murati, ka bërë të ditur se krahas pagës së 13-të për sektorin publik, janë ekzekutuar edhe pagat e rregullta, të cilat këtë herë përfshijnë shtesën e rritur për përvojën e punës.
Sipas Muratit, shtesa për përvojën e punës është rritur nga 0.50% (nga 0.25% sa ishte më parë) për 15 vitet e para të përvojës. Ky ndryshim nënkupton një rritje efektive të pagës për të gjithë të punësuarit që marrin pagë nga buxheti i shtetit.
“Vlen të theksohet se shtesa e rritur e përvojës së punës është paguar në mënyrë retroaktive edhe për dy muajt e kaluar, janar dhe shkurt”, deklaroi ministri përmes një postimi në rrjetet sociale.
Udhëzimet për gratë në pushim të lehonisë Sa i përket shqetësimeve për pagën e 13-të, veçanërisht për gratë që ndodhen në pushim të lehonisë dhe mund të mos e kenë pranuar pagesën dje, Murati ka dhënë udhëzime të qarta.
“Kurse sa u përket rasteve të grave në pushim të lehonisë që mund të mos jenë procesuar dje për pagën e 13-të, të punësuarat duhet t’u drejtohen menaxhmentit në institucionin ku punojnë”, shpjegoi ai.
Ministri sqaroi se listat e pagave përgatiten nga secili institucion përkatës dhe se ato janë përgjegjëse për lëshimet eventuale. Megjithatë, ai siguroi se çdo lëshim teknik mund të korrigjohet dhe të ekzekutohet në muajin vijues.
