Ministrja e Industrisë, Ndërmarrësisë dhe Tregtisë, Mimoza Kusari-Lila, gjatë seancës së sotme në Kuvend, ka dhënë detaje rreth procesit të verifikimit të njehsorëve elektrikë pas ankesave të shumta të qytetarëve për faturime të fryera.
Sipas raportimit të Ekonomia Online, ministrja bëri të ditur se pas aktualizimit të kësaj çështjeje në publik, numri i kërkesave për verifikim ka pësuar rritje të hovshme.
„Agjencia e Metrologjisë, në kuadër të ministrisë sonë, parasheh verifikimin e jashtëzakonshëm të njësive matëse. Në bazë të nenit 26 të projektligjit, është themeluar një grup punues ad-hoc, i përbërë nga përfaqësues të Agjencisë së Metrologjisë dhe nën mbikëqyrjen e Inspektoratit Qendror të Tregut. Deri në momentin kur çështja u bë publike, nuk kishim asnjë kërkesë në Zyrën për Mbrojtjen e Konsumatorit, por gjendja ka ndryshuar menjëherë“, deklaroi Kusari-Lila.
Rritja e numrit të kërkesave dhe gjetjet teknike Ministrja specifikoi se vetëm gjatë ditës së djeshme janë pranuar 70 kërkesa, ndërsa sot ky numër ka arritur në 206 kërkesa për verifikim të njehsorëve.
„Verifikimi ka filluar dhe rezultatet do të bëhen publike në fund të ditës. Nga të dhënat e deri tanishme, problemet teknike të identifikuara nuk kanë të bëjnë me ndryshimin e vëllimit apo sasisë së energjisë së matur, por me tarifat ose kohët tarifore“, theksoi ajo, duke lënë të kuptohet se njehsorët po llogarisin tarifën e shtrenjtë në kohën kur duhet të ishte ajo e lira.
Paralajmërim për sanksione Kusari-Lila nënvizoi se Ligji për Metrologjinë është i qartë sa u përket pasojave për subjektet që nuk respektojnë standardet. Ajo bëri me dije se të gjitha analizat do t’i dërgohen Zyrës së Rregullatorit për Energji (ZRRE) për marrjen e masave të mëtutjeshme.
„Neni 46 i Ligjit për Metrologjinë parasheh sanksione dhe dënime si për subjektet fizike, ashtu edhe për organizatat. Ne do të veprojmë në përputhje me legjislacionin në fuqi dhe me Ligjin për Inspektoratin dhe Mbikëqyrjen e Tregut për të mbrojtur interesin e konsumatorëve“, përfundoi ministrja.
