Njohësi i çështjeve kushtetuese, Mazllum Baraliu, ka deklaruar se Kushtetuta e Republikës së Kosovës ka nevojë për ndryshime thelbësore, por ka theksuar se për një proces të tillë nevojitet vullnet i qartë politik.
Gjatë një paraqitjeje në emisionin „Ora 7”, Baraliu u ndal te përmbajtja e nenit të parë të Aktit më të Lartë Juridik të vendit, duke bërë krahasime me formulimet kushtetuese të shteteve të rajonit. Sipas tij, definimi aktual i Kosovës nuk pasqyron identitetin e shumicës, siç ndodh me shtetet fqinje.
“Në nenin e parë, në paragrafin e parë, duhet të shkruhet: ‘Kosova është shtet i shqiptarëve dhe i komuniteteve të tjera që jetojnë në të’, por nuk shkruhet kështu. Për shembull, në Kushtetutën e Malit të Zi dhe në shumicën e kushtetutave të tjera, si në Maqedoninë e Veriut, kështu shkruhet”, deklaroi Baraliu.
Ndryshime urgjente dhe domosdoshmëria e vullnetit politik Pavarësisht peshës historike që ka ky dokument, profesor Baraliu nënvizoi se dinamikat e reja kërkojnë ndërhyrje juridike për ta bërë Kushtetutën më funksionale dhe më përfaqësuese.
“Pavarësisht rëndësisë historike, ka nevojë të domosdoshme dhe urgjente që ajo të ndryshohet. Mirëpo, për këtë duhet vullnet politik”, u shpreh ai, duke lënë të kuptohet se pengesat kryesore mbeten te konsensusi i brendshëm politik dhe procedurat e vështira për amendamentim.
Kujtojmë se 9 prilli shënon Ditën e Kushtetutës së Kosovës, e cila u miratua në vitin 2008, vetëm pak javë pas shpalljes së pavarësisë.
