Gjatë qëndrimit të tij zyrtar në Emiratet e Bashkuara Arabe, kryeministri britanik, Keir Starmer, u ka dërguar një mesazh të prerë aleatëve të Gjirit, duke theksuar se Irani nuk duhet ta mbajë Ngushticën e Hormuzit si “peng” të interesave të tij.
Starmer ka përsëritur se Mbretëria e Bashkuar mbetet konsistente në qëndrimin e saj për uljen e tensioneve në rajon dhe për arritjen e një armëpushimi të qëndrueshëm. Sipas tij, komuniteti ndërkombëtar duhet të bashkohet për të gjetur një zgjidhje afatgjatë për sigurinë në këtë pikë strategjike ujore.
Meloni: Siguria në Hormuz, interes jetik për BE-në Në të njëjtën linjë është shprehur edhe kryeministrja e Italisë, Giorgia Meloni, e cila të enjten deklaroi se rivendosja e lirisë së lundrimit në Ngushticën e Hormuzit është një interes jetik për vendin e saj dhe për mbarë Bashkimin Evropian.
Meloni u zotua se Italia do të vazhdojë bashkëpunimin e ngushtë me partnerët ndërkombëtarë për të garantuar sigurinë e furnizimeve globale.
“Ne tashmë po punojmë me koalicionin e udhëhequr nga Mbretëria e Bashkuar për Ngushticën e Hormuzit, i cili përfshin më shumë se 30 vende. Synimi ynë është të ndërtojmë kushte sigurie që lejojnë rivendosjen e plotë të lirisë së lundrimit dhe furnizimit”, ka deklaruar Meloni.
Situata në Ngushticën e Hormuzit mbetet e tensionuar, ndërsa koalicioni ndërkombëtar po shton përpjekjet diplomatike dhe ushtarake për të parandaluar bllokimin e njërës prej rrugëve më të rëndësishme për tregtinë botërore të naftës dhe gazit.
