Presidenti i Serbisë, Aleksandar Vuçiq, ka njoftuar sot për një takim të zhvilluar në zyrën e tij në Beograd me emisarin e Bashkimit Evropian, Peter Sorensen, me të cilin ka diskutuara për situatën politike dhe të sigurisë në rajon.
Vuçiq e cilësoi takimin si një “bisedë të thelluar”mbi çështjet kyçe që rëndojnë marrëdhëniet rajonale. Gjatë bisedës, kreu i shtetit serb shprehu shqetësimet e tij për situatën aktuale në Kosovë, duke vënë theksin te siguria e popullit serb dhe atë që ai e quajti „zbatim selektiv të rregullave dhe diskriminim të dukshëm”.
Akuzat për “masa të njëanshme” Presidenti serb akuzoi autoritetet e Kosovës për ndërmarrjen e “masave të njëanshme”, të cilat sipas tij krijojnë presion serioz mbi popullin dhe institucionet serbe.
“Nënvizova se Serbia mbetet e përkushtuar fort ndaj dialogut si e vetmja rrugë e qëndrueshme për zgjidhjen e çështjeve të hapura, por gjithashtu presim angazhim konkret nga aktorët në Prishtinë për zbatimin e marrëveshjeve tashmë të arritura. Veçanërisht theksova rëndësinë e formimit të Asociacionit të Komunave me shumicë serbe, si një element kyç për mbrojtjen e të drejtave dhe sigurisë së popullit tonë”, deklaroi Vuçiq.
Thirrja për ndërhyrjen e Bashkimit Evropian Vuçiq pretendoi se veprimet e fundit të Prishtinës po minojnë drejtpërdrejt procesin e dialogut dhe po rrezikojnë stabilitetin e brishtë në terren. Ai kërkoi një angazhim më të fortë nga Bashkimi Evropian për të parandaluar aktivitetet që, sipas tij, pengojnë zhvillimin konstruktiv të bisedimeve.
Në fund të njoftimit, presidenti serb rikonfirmoi se vendi i tij do të veprojë me përgjegjësi në mbrojtje të interesave kombëtare, duke pretenduar se komunikimi i hapur me partnerët ndërkombëtarë është thelbësor për gjetjen e zgjidhjeve afatgjata në interes të paqes dhe sigurisë.
