Aktorja fituese e çmimit Oscar, Cate Blanchett, do të interpretojë manjaten e medias dhe ikonën e stilit Martha Stewart në filmin biografik me titull “Good Thing”.
Projekti do të drejtohet nga Janicza Bravo, e njohur për punën e saj në seriale si “The Bear”, “Poker Face” dhe “In Treatment”. Ky film shënon gjithashtu një ribashkim mes regjisores dhe Blanchett, të cilat kanë bashkëpunuar më parë në “Mrs. America”.
Martha Stewart u bë e famshme në vitet 1980 falë librave të saj për gatim dhe stil jetese, duke ndërtuar më pas një perandori mediatike që përfshinte revista, produkte shtëpiake dhe emisione televizive, përfshirë “Martha Stewart Living”. Me kompaninë e saj Martha Stewart Living Omnimedia, ajo u bë gruaja e parë miliardere në SHBA që ndërtoi vetë pasurinë e saj.
Megjithatë, rrugëtimi i saj është shoqëruar edhe me polemika. Në vitin 2004, ajo u përfshi në një proces gjyqësor të shumëpërfolur dhe u shpall fajtore për disa akuza federale, duke vuajtur pesë muaj burg.
Filmi “Good Thing” pritet të sjellë në ekran historinë e plotë të ngritjes, suksesit dhe sfidave të një prej figurave më të fuqishme të industrisë së stilit të jetesës. /KultPlus
