BE-ja premton një ekonomi dhe mbrojtje më të fortë në samitin e Hungarisë
storm•/Hungari: Pas rizgjedhjes së Donald Trump-it, liderët evropianë përfunduan një samit dy-ditor, duke premtuar të transformojnë ekonominë e bllokut. Mikpritësi, Viktor Orban, gjithashtu nxiti liderët e BE-së të ndjekin ‘paqen’ në Ukrainë.
Liderët evropianë kanë premtuar të rrisin konkurrencën e bllokut pas një samiti joformal të Këshillit Evropian në Budapest.
Takimi u mbajt nga kryeministri hungarez Viktor Orban, i cili në një konferencë për shtyp deklaroi se besonte që qëllimi i përbashkët i liderëve të mbledhur ishte “të bëjmë Evropën të madhe përsëri,” një referencë ndaj sloganit të presidentit të sapozgjedhur të SHBA-së, Donald Trump.
Ndikimi i një presidencë të afërt të Trump-it ishte shumë i pranishëm në samit, ku liderët diskutuan sesi blloku mund të bashkëpunojë politikisht me Trump-in dhe si mund të konkurrojë ekonomia evropiane me atë të SHBA-së.
Orban, një aleat i Trump-it, tha se masat e përfshira në deklaratën e Budapestit përfshijnë hapa urgjentë për të ulur çmimet e larta të energjisë në të gjithë bllokun.
Orban: Evropa duhet të ‘kalojë nga lufta te paqja’
Kryeministri hungarez u tha të premten europianëve se rizgjedhja e Donald Trump-it do të ndryshojë rregullat e lojës lidhur me luftën e Rusisë në Ukrainë dhe i kërkoi BE-së që të “kalojë nga lufta te paqja.”
“Situata në front është e qartë, ka një disfatë ushtarake” për Ukrainën, tha Orban në një intervistë radiofonike.
Ndërkohë, presidenti francez Emmanuel Macron dhe kryeministri polak Donald Tusk lëshuan një deklaratë të përbashkët në Budapest duke ritheksuar “vendosmërinë e tyre për të ofruar mbështetje të pandërprerë për Ukrainën dhe popullin ukrainas.”
Ata ritheksuan angazhimin për “të mbështetur dhe forcuar mbështetjen” për Kievin me qëllim zmbrapsjen e agresionit rus.
Scholz: Evropa të ‘bashkëpunojë mirë me Trump-in’
Në lidhje me Trump-in, kancelari gjerman Olaf Scholz ritheksoi gatishmërinë e tij për të bashkëpunuar me presidentin e ardhshëm të SHBA-së.
Por ai nënvizoi se Evropa duhet të kujdeset edhe për sigurinë e saj.
“Ne duhet të bashkëpunojmë si Bashkimi Evropian, si evropianë, për të bërë atë që është e nevojshme për sigurinë tonë,” tha ai.
“Do të jemi të suksesshëm nëse të gjithë japim kontributin tonë,” shtoi ai.
Në Budapest, Scholz tha se Evropa do të “vazhdojë të bashkëpunojë mirë me presidentin e ardhshëm amerikan.”
Lidhur me tarifat e mundshme nga ana e Trump-it dhe ndikimin e tyre në ekonominë e BE-së, Scholz tha se blloku ishte i përgatitur për këtë.
“Nuk mendoj se duhet të spekulojmë shumë për këtë çështje me SHBA-në. BE-ja ka kompetencat për të bërë atë që është e nevojshme. Por të gjithë duhet qartë të kërkojmë bisedime,” shtoi Scholz.
Von der Leyen: BE-ja duhet të kryejë reforma ekonomike
Në lidhje me ekonominë e BE-së, presidentja e Komisionit Ursula von der Leyen tha të premten se blloku duhet të zbatojë shpejt reformat ekonomike.
Ish-kreu i Bankës Qendrore Evropiane, Mario Draghi, publikoi një raport të gjerë që tërhiqte vëmendjen për dështimin e Evropës për të mbajtur hapin me SHBA-në, duke theksuar produktivitetin e ulët dhe ngadalësimin ekonomik të BE-së.
“Rekomandimet në këtë raport janë tashmë urgjente, duke pasur parasysh situatën ekonomike në të cilën jemi sot. Ato janë bërë edhe më urgjente pas zgjedhjeve në SHBA,” tha Draghi.
Von der Leyen gjithashtu premtoi të premten se do të propozojë një “marrëveshje të pastër industriale” për të mbështetur dekarbonizimin e ekonomisë evropiane brenda “100 ditëve të para” të Komisionit të saj të ri Evropian që pritet të fillojë punën në dhjetor.
Ajo gjithashtu sugjeroi reduktimin e burokracisë për bizneset, si dhe krijimin e një unioni kursimesh dhe investimesh për t’u siguruar kompanive qasje në kapital për kërkime dhe inovacion.
