Kryeministri izraelit Benjamin Netanyahu ka zhvilluar të dielën një vizitë të paparalajmëruar në Emiratet e Bashkuara Arabe, ku është takuar me presidentin Sheikh Mohammed bin Zayed Al Nahyan në Abu Dhabi.
Channel 12 raportoi, duke cituar dy burime, se Netanyahu udhëtoi drejt Emirateve me avion privat dhe kaloi pjesën më të madhe të ditës atje. Një burim diplomatik e konfirmoi më pas takimin edhe për The Jerusalem Post.
Sipas raportimeve izraelite, vizita ishte mbajtur larg vëmendjes publike dhe bisedimet mes Netanyahut dhe bin Zayed u zhvilluan në pjesën më të madhe kokë më kokë. Netanyahu është kthyer në Izrael në mbrëmje, ndërsa Zyra e Kryeministrit nuk ka bërë publike temat e diskutuara.
Vizita merr peshë të veçantë në një moment shumë të ndjeshëm për rajonin, me luftën dhe tensionet rreth Iranit, Gazës dhe arkitekturës së sigurisë në Lindjen e Mesme në qendër të diplomacisë rajonale. Po ashtu, ajo ndodh vetëm pak ditë pas raportimeve të reja rreth paralajmërimeve që inteligjenca e Emirateve dyshohet se i kishte përcjellë Izraelit para sulmit të Hamasit të 7 tetorit 2023.
