TEHERAN — Irani po paralajmëron për një skenar të ri dhe potencialisht shumë të rrezikshëm në përplasjen me Izraelin, duke pretenduar se mund të përgatitet një operacion “false flag” që përfshin aviacionin civil, me synimin që përgjegjësia t’i atribuohet Teheranit dhe të rritet presioni ndërkombëtar ndaj Republikës Islamike.
Sipas pretendimit iranian, një incident që prek aviacionin civil mund të përdorej për të krijuar perceptimin se Irani përbën kërcënim të drejtpërdrejtë për sigurinë ndërkombëtare dhe për të krijuar mbështetje më të gjerë politike për masa të reja kundër tij.
Teherani ka ngritur edhe më herët akuza të ngjashme. Në mars, sekretari i Këshillit Suprem të Sigurisë Kombëtare, Ali Larijani, paralajmëroi publikisht për atë që e përshkroi si një komplot për të organizuar një incident të madh terrorist dhe për t’ia atribuar Iranit. Ai tha se Irani kundërshton akte të tilla dhe se vendi ndodhet në pozicion mbrojtës ndaj SHBA-së dhe Izraelit.
Edhe gjatë shtatorit, Ministria e Jashtme iraniane paralajmëroi kundër asaj që e përshkroi si mundësi të operacioneve “false flag”, pasi u raportua për një dron të interceptuar që dyshohej se po lëvizte drejt Mekës. Teherani kërkoi që incidente të tilla të mos përdoren për t’i atribuar automatikisht përgjegjësi Iranit.
Akuzat vijnë në një moment kur përplasja Iran–Izrael është zgjeruar shumë përtej frontit klasik ushtarak: dronë, raketa, operacione kibernetike, inteligjencë dhe luftë informative po përdoren paralelisht nga palët.
Pretendimi i fundit iranian për një operacion kundër aviacionit civil mbetet akuzë e Teheranit dhe nuk është shoqëruar deri tani me prova publike që ta vërtetojnë skenarin. Izraeli nuk ka konfirmuar një operacion të tillë.
Megjithatë, paralajmërimi tregon nivelin e mosbesimit mes dy vendeve dhe rrezikun që një incident në aviacionin civil të shndërrohet shumë shpejt në krizë të re ndërkombëtare.
