Departamenti amerikan i Mbrojtjes ka konfirmuar se publiku do të mund ta ndjekë përmes transmetimit online ekzekutimin e ish-majorit të Ushtrisë amerikane Nidal Malik Hasan, i dënuar me vdekje për sulmin në Fort Hood të vitit 2009.
Sekretari i Mbrojtjes Pete Hegseth tha se vendimi për ta bërë ekzekutimin publik synon, sipas tij, të tregojë se veprime të tilla kanë “pasoja serioze”. Pentagoni më pas sqaroi se qasja publike do të realizohet përmes një livestream-i, ndërsa detajet teknike pritet të publikohen më vonë.
Hasan u shpall fajtor në vitin 2013 për vrasjen e 13 personave dhe tentim-vrasjen e dhjetëra të tjerëve në bazën ushtarake të Fort Hood. Ekzekutimi është planifikuar për 3 dhjetor.
Vendimi ka hapur menjëherë debat në SHBA. Nënpresidenti JD Vance ka thënë se nuk do ta shikojë transmetimin, ndërsa senatorë dhe organizata fetare e të të drejtave të njeriut kanë kundërshtuar kthimin e dënimit kapital në një ngjarje publike.
