Presidenti amerikan Donald Trump ka njoftuar një zhvillim të rëndësishëm në luftën Rusi–Ukrainë: sipas tij, Moska dhe Kyiv-i kanë pranuar një “energy ceasefire”, që hyn në fuqi menjëherë.
Në një postim në rrjetet sociale, Trump tha:
“Me efekt të menjëhershëm, ka një ARMËPUSHIM ENERGJETIK në luftën mes Rusisë dhe Ukrainës. Të dyja palët kanë rënë dakord.”
Ai u bëri thirrje të dyja palëve që të mos e shkelin marrëveshjen.
Në praktikë, marrëveshja pritet të nënkuptojë ndaljen reciproke të goditjeve ndaj infrastrukturës energjetike, pasi Rusia dhe Ukraina kanë intensifikuar muajt e fundit sulmet ndaj sistemeve energjetike të njëra-tjetrës.
Kyiv-i kishte sinjalizuar edhe më herët gatishmëri për një marrëveshje të tillë. Zelensky kishte deklaruar se Ukraina ishte e gatshme t’i ndalte sulmet ndaj objektivave energjetike ruse nëse Moska bënte të njëjtën gjë. Administrata Trump kishte punuar prej javësh për një armëpushim të fokusuar pikërisht te energjia.
Njoftimi vjen vetëm pak ditë pas marrëveshjes së debatueshme SHBA–Rusi për furnizimin me dizel rus, e cila shkaktoi reagim të ashpër në Kyiv dhe në disa kryeqytete evropiane.
Pika që mbetet ende e paqartë është si do të monitorohet armëpushimi, cilat objekte konsiderohen të mbrojtura dhe çfarë ndodh në rast të shkeljes së tij. Reuters dhe AP theksojnë se, në momentin e njoftimit të Trumpit, as Rusia dhe as Ukraina nuk kishin dhënë konfirmim publik të veçantë.
Nëse zbatohet, marrëveshja mund të jetë një nga hapat më konkretë të de-përshkallëzimit të muajve të fundit, veçanërisht ndërsa Ukraina hyn në dimër me rrjetin energjetik nën presion të madh.
