KYIV/WASHINGTON — Vetëm disa orë pasi Presidenti Donald Trump njoftoi se Rusia dhe Ukraina kishin rënë dakord për një “armëpushim energjetik” me efekt të menjëhershëm, Ukraina raportoi goditje të reja ruse pikërisht ndaj infrastrukturës së saj energjetike.
Presidenti ukrainas Volodymyr Zelensky tha se një dron rus Shahed goditi një termocentral në Kyiv, duke shkaktuar ndërprerje të energjisë elektrike në disa pjesë të kryeqytetit. Më vonë, sipas tij, u goditën edhe objekte energjetike në rajonin e Kharkivit. Presidenca ukrainase konfirmoi se goditjet ndodhën pas deklaratës së Trumpit për armëpushimin.
Trump kishte shkruar më herët se, “me efekt të menjëhershëm”, ekzistonte një armëpushim energjetik dhe se “të dyja palët kishin rënë dakord”, duke u bërë thirrje Moskës dhe Kyiv-it që të mos e shkelnin atë. Ai nuk dha hollësi për mënyrën e monitorimit apo për objektet që do të përfshiheshin në marrëveshje.
Por deklarata duket se e kapi Kyiv-in në befasi.
Reuters raportoi se Zelensky po priste detajet nga pala amerikane, ndërsa theksoi se Ukraina ishte e gatshme ta mbështeste një marrëveshje të tillë vetëm nëse Rusia do të ndalte gjithashtu sulmet ndaj infrastrukturës energjetike ukrainase.
Në adresimin e tij të mbrëmjes, Zelensky tha se njoftimi amerikan ishte “lajm i mirë për të gjithë”, por shtoi se marrëveshja duhet të bëhet realitet në terren.
“Ukraina është e gatshme të përmbahet nga goditjet ndaj infrastrukturës energjetike ruse — dhe presim të njëjtën gatishmëri nga Rusia”, ishte qëndrimi zyrtar i presidentit ukrainas.
Problemi është se, sipas Kyiv-it, goditjet ruse nuk u ndalën.
Zelensky i tha presidentes së Komisionit Evropian, Ursula von der Leyen, se pak para bisedës së tyre Rusia kishte goditur një termocentral në Kyiv me një Shahed dhe se më pas ishin goditur edhe objekte energjetike në Kharkiv.
AP raportoi gjithashtu se Rusia goditi një termocentral në Kharkiv pas njoftimit të Trumpit, ndërsa Ukraina përsëriti se do të ndalte sulmet ndaj energjisë ruse vetëm nëse Moska vepronte në mënyrë reciproke.
Moska ende pa një “po” publik
Një element vendimtar mbetet i paqartë: Rusia nuk kishte konfirmuar publikisht se kishte pranuar marrëveshjen e shpallur nga Trumpi.
Reuters raportoi se as Moska dhe as Kyiv-i nuk e kishin konfirmuar paraprakisht marrëveshjen në momentin kur presidenti amerikan e bëri njoftimin. Edhe më 12 tetor, paqartësitë rreth asaj se çfarë ishte negociuar realisht vazhdonin.
Kjo e vendos armëpushimin energjetik në një situatë të pazakontë: Trump thotë se marrëveshja ekziston, Ukraina thotë se është gati ta zbatojë, ndërsa goditjet ruse ndaj energjisë vazhduan menjëherë pas shpalljes së saj.
Tani vëmendja është te Moska dhe te Presidenti Vladimir Putin: a do ta konfirmojë Kremlini armëpushimin dhe, mbi të gjitha, a do të ndalen realisht goditjet ndaj sistemit energjetik të Ukrainës?
