KOMANDANTI I NATO-s: “NËSE SULMOHEMI, JEMI GATI TË LUFTOJMË SONTE”
NATO ka dërguar një nga mesazhet më të drejtpërdrejta të muajve të fundit për gatishmërinë e saj ushtarake. Duke folur në Warsaw Security Forum, gjenerali amerikan Alexus Grynkewich tha se Aleanca është e përgatitur të reagojë menjëherë nëse territori i ndonjë prej 32 vendeve anëtare sulmohet.
“Nëse sulmohemi, jemi gati të luftojmë sonte.”
Por Grynkewich bëri edhe një sqarim të rëndësishëm: sipas vlerësimit të tij, një konflikt i drejtpërdrejtë në territorin e NATO-s nuk është as i afërt dhe as i pashmangshëm. Qëllimi i mesazhit, tha ai, është që kundërshtarët të dinë se një sulm ndaj Aleancës nuk do të kishte sukses.
Në Varshavë ai prezantoi atë që e quajti “Theory of Victory”, një koncept mbrojtës që synon ta ndalë një sulm që në fazat e para dhe, nëse ai vazhdon, t’ia pamundësojë agresorit ruajtjen e iniciativës dhe të territorit të pushtuar. Grynkewich tha se çdo sulm ndaj një aleati duhet të përfundojë si “krejtësisht i kotë” për agresorin.
Mesazhi vjen në një klimë të tensionuar sigurie në Evropë. Vendet e krahut lindor të NATO-s kanë ngritur shqetësime për incidente me dronë, sabotime, zjarrvënie dhe sulme kibernetike që qeveritë perëndimore ia atribuojnë Rusisë. NATO vazhdon ta konsiderojë Rusinë kërcënimin më të rëndësishëm të drejtpërdrejtë për sigurinë e aleatëve.
Grynkewich gjithashtu riafirmoi se SHBA mbetet e angazhuar ndaj Nenit 5, parimit sipas të cilit sulmi ndaj një vendi anëtar konsiderohet sulm ndaj të gjithë Aleancës. Ai kujtoi se forcat amerikane vazhdojnë të jenë të dislokuara në Poloni dhe përgjatë krahut lindor.
