storm•/Zgjedhjet SHBA: Stafi i një filiali të McDonald’s në Alameda, Kaliforni, është urdhëruar të ruajë sekretin mbi faktin nëse Kamala Harris ka punuar ndonjëherë aty, pasi Donald Trump e akuzoi atë se po gënjen për këtë punë të saj.
Gjatë një vizite në një tjetër filial të McDonald’s në Feasterville, Pennsylvania, Trump e çoi dramën në një nivel tjetër, duke përgatitur patate të skuqura në furrën e restorantit dhe duke shërbyer klientëve nga dritarja e drive-thru. Ndërsa po shërbente, ai tha me entuziazëm: “Kjo është argëtuese, mund ta bëj gjithë ditën.”
Kamala Harris ka folur shpesh për punën e saj në McDonald’s gjatë studimeve të saj universitare në vitet ’80, duke thënë se kjo përvojë e frymëzoi atë të mbështesë familjet punëtore. Por Trump, i cili është një fans i kahershëm i McDonald’s, e ka cilësuar këtë histori si një përpjekje për të fituar besimin e votuesve të klasës punëtore, duke pretenduar se ajo nuk është e vërtetë.
Ndërkohë, McDonald’s mbetet një hapësirë e shpeshtë për politikanët që kërkojnë të tregojnë autenticitetin e tyre para votuesve. Ndër figurat që kanë vizituar restorantet e kësaj zinxhiri janë edhe Bill Clinton, Ronald Reagan dhe Mitt Romney, ndërsa Trump është i njohur për dashurinë e tij për Big Mac dhe Filet-O-Fish.
Pavarësisht këtyre pretendimeve dhe spekulimeve, as Harris dhe as Trump nuk kanë ofruar prova konkrete për deklaratat e tyre, dhe McDonald’s ka refuzuar të komentojë mbi këtë çështje.
