Mahmoud Abbas e ka quajtur Hamasin “bijtë e qenve” në një fjalim të zjarrtë në të cilin ai kërkoi që grupi të lirojë pengjet që ende mban, të çarmatosë dhe të dorëzojë kontrollin e Gazës në mënyrë që t’i japë fund luftës me Izraelin.
Presidenti i Autoritetit Palestinez tha në një takim në Bregun Perëndimor të pushtuar se Hamasi i kishte dhënë Izraelit “arsyetime” për të vazhduar sulmet e tij në Gaza dhe tha se grupi duhet që “të lirojë pengjet dhe t’i jap fund luftës”.
Javën e kaluar, grupi hodhi poshtë një propozim izraelit për një armëpushim të ri në Gaza, i cili përfshinte një kërkesë për çarmatim në këmbim të një pauze gjashtë-javore të armiqësive dhe lirimin e 10 nga 59 pengjet e mbetura.
Hamasi përsëriti se do të dorëzonte të gjithë pengjet në këmbim të përfundimit të luftës dhe një tërheqjeje të plotë të Izraelit. Ajo gjithashtu përjashtoi mundësinë e heqjes dorë nga armët e saj.
PA, e cila udhëhiqet nga Abbas dhe e dominuar nga lëvizja e tij Fatah, ka qeverisur vetëm pjesë të Bregut Perëndimor që kur Hamasi mori kontrollin e Gazës në vitin 2007, një vit pasi fitoi zgjedhjet legjislative.
Udhëheqja e PA-së ka këmbëngulur rregullisht se është gati të marrë drejtimin e Gazës së pasluftës. Por është kritikuar nga palestinezët se nuk ka folur mjaftueshëm ose nuk ka ndërmarrë veprime efektive.
Abbas sulmoi Hamasin në një fjalim të tërbuar në një takim të Këshillit Qendror Palestinez në Ramallah.
“Hamasi i ka dhënë pushtimit kriminal [Izraelit] justifikime për të kryer krimet e tij në Rripin e Gazës, më e spikatura është mbajtja e pengjeve”, tha ai.
“Bij qensh, thjesht lironi këdo që mbani dhe mbaroni me të. Mbyllni justifikimet e tyre dhe na kurseni”.
Presidenti tha gjithashtu se Hamasi duhet t’ia “dorzojë” PA-së përgjegjësinë për Gazën dhe armët e saj dhe të shndërrohet në një parti politike.
Anëtari i byrosë politike të Hamasit, Bassem Naim, kritikoi deklaratat e Abasit për të “përshkruar një pjesë të rëndësishme dhe integrale të popullit të tij duke përdorur gjuhë nënçmuese”.
“Abbas në mënyrë të përsëritur dhe të dyshimtë hedh fajin për krimet e okupimit dhe agresionin e tij të vazhdueshëm mbi popullin tonë”, shtoi ai.
