Adnan Rrustemi lëshon “bombën” ndaj diplomatëve: Mos e shkatërroni Gjykatën Kushtetuese me vizita e ndërhyrje

Deputeti i Lëvizjes Vetëvendosje, Adnan Rrustemi, ka reaguar ashpër ndaj vizitave të fundit të ambasadorëve të huaj në Gjykatën Kushtetuese.

Përmes një postimi, Rrustemi i ka “lutur” diplomatët që të qëndrojnë larg institucionit më të lartë juridik, duke i cilësuar takimet e tyre si ndërhyrje që shkatërrojnë pavarësinë e gjykatës.

Sipas tij, pasojat e këtyre lëvizjeve diplomatike do të jenë të pariparueshme për Kosovën, duke lënë të kuptohet se vendimi për dekretin e Presidentes mund të ndikohet nga jashtë.

Ky reagim vjen në një moment kritik, kur Gjykata Kushtetuese duhet të vendosë nëse dekreti i Vjosa Osmanit për shpërndarjen e Kuvendit është legjitim apo duhet të pezullohet sipas kërkesës së VV-së.