Një operacion policor ka tronditur banorët e lagjes “Prishtina e Re” pasditen e djeshme, ku njësitë speciale ndërhynë me forcë në një nga objektet e kompleksit “Agullimi” nën dyshimet për narkotikë.
Pamjet që po shihni i përkasin pasdites së djeshme, saktësisht pak kohë para orarit të Iftarit, kur qetësia e lagjes “Prishtina e Re” u ndërpre nga një aksion blic i Policisë së Kosovës. Dëshmitarët në vendngjarje rrëfyen për storm• se shënjestër e kësaj bastisjeje ishte një nga banesat në objektin e njohur si “Agullimi“.
Sipas informacioneve të para, dyshimet e forcave të rendit lidhen me veprimtari të rënda kriminale, konkretisht me trafikimin e drogës dhe narkotikëve të tjerë. Operacioni nuk ishte i lehtë, pasi për rreth 10 minuta dera e banesës nuk u hap, duke i detyruar zyrtarët policorë të përdornin mjetet e rënda për thyerjen e dyerve me dhunë.
Deri në këto momente, mbetet ende e paqartë nëse bëhet fjalë për një grup të organizuar apo për një person të vetëm të dyshuar. Policia ka mbajtur një rrethim të rreptë të zonës deri në përfundimin e të gjitha procedurave të kontrollit brenda objektit.
Dilemat vazhdojnë edhe sa i përket arrestimeve. Nuk dihet nëse personat e dyshuar ishin prangosur paraprakisht dhe kjo ishte një bastisje pas arrestimit, apo nëse prangat u vendosën pikërisht gjatë kësaj ndërhyrjeje dramatike në katin e banimit.
Policia e Kosovës pritet të japë detaje shtesë mbi sasinë e mundshme të narkotikëve të konfiskuar dhe identitetin e personave të përfshirë në këtë rrjet që operonte në zemër të lagjes së re të kryeqytetit.
