Ushtruesja e detyrës së presidentes, Albulena Haxhiu, ka përkujtuar sot 9 prillin e vitit 1999, një nga ditët më të dhimbshme dhe më të rënda të luftës çlirimtare në Kosovë.
Përmes një postimi në rrjetin social Facebook, Haxhiu ka nderuar të rënët e kësaj date historike, duke vënë theksin te rëndësia e ruajtjes së kujtesës kolektive për sakrificën e dëshmorëve dhe martirëve të kombit.
“Në mesin e tyre kishte burra dhe gra, por edhe djem dhe vajza të reja, që nuk zgjodhën të tërhiqen përballë dhunës, por të qëndrojnë. Emra si Luminije Raka, Jehona Raka, Emsale Frangu dhe Mukadeze Muhaxheri-Lika mbeten dëshmi se sakrifica për liri nuk ka qenë kurrë e njëanshme, por e përbashkët, e barabartë dhe e pakushtëzuar”, shkroi ajo.
Haxhiu nënvizoi se pas 27 vjetësh, përgjegjësia institucionale dhe qytetare mbetet ruajtja e integritetit të kësaj sakrifice, e cila ishte po aq e palëkundur sa edhe qëndresa e popullit të Kosovës.
„Sot, 27 vjet më pas, i kujtojmë me nderim të gjithë të rënët e 9 prillit, me përgjegjësinë që kjo sakrificë të ruhet e plotë, ashtu siç ishte edhe qëndresa e tyre. Lavdi e përjetshme dëshmorëve dhe martirëve të kombit“, përfundoi mesazhin e saj u.d. presidentja Haxhiu.
