Ushtruesja e detyrës së presidentes, Albulena Haxhiu, ka pritur sot në takim ministrin e Mbrojtjes, Ejup Maqedoncin, si dhe komandantin e Forcës së Sigurisë së Kosovës (FSK), gjenerallejtënant Bashkim Jasharin.
Gjatë këtij takimi, Haxhiu bëri të ditur se u diskutua gjerësisht për arritjet në zhvillimin e kapaciteteve mbrojtëse të vendit, sfidat aktuale të sigurisë dhe hapat e ardhshëm që duhen ndërmarrë për fuqizimin strategjik të FSK-së.
Përmes një postimi në rrjetin social Facebook, ajo theksoi se modernizimi dhe avancimi i ushtrisë mbetet një nga shtyllat kryesore të shtetësisë së Kosovës.
“Zhvillimi i mëtejmë i FSK-së mbetet prioritet shtetëror dhe kyç për forcimin e sigurisë së Republikës së Kosovës”, ka shkruar Haxhiu, transmeton Klankosova.tv.
Takimi rikonfirmon përkushtimin institucional për rritjen e gatishmërisë operacionale të FSK-së, në përputhje me standardet e NATO-s, për të garantuar mbrojtjen e sovranitetit dhe integritetit territorial të vendit në një periudhë me sfida të ndjeshme gjeopolitike.
