Ambasada e Shteteve të Bashkuara të Amerikës në Prishtinë ka publikuar disa fotografi që pasqyrojnë atmosferën e jashtëzakonshme në prag të ndeshjes më të rëndësishme në historinë e futbollit kosovar, e cila luhet sonte në kryeqytet.
Në njërën prej imazheve të publikuara, shihet e Ngarkuara me Punë e Ambasadës, Anu Prattipati, e veshur me fanellën e Kombëtares së Kosovës, duke treguar hapur përkrahjen për ekipin vendas. Ky gjest vjen në prag të ndeshjes finale të “play-off”-it ndërmjet Kosovës dhe Turqisë, e cila përcakton kualifikimin historik në Kampionatin Botëror “Amerikë 2026”.
Përmes një mesazhi të veçantë, Ambasada Amerikane ka shprehur mbështetjen e pakursyer për futbollistët kosovarë, duke i inkurajuar ata që të japin maksimumin në fushën e gjelbër.
„Nga të gjithë ne në Ambasadën e Shteteve të Bashkuara, po ju mbështesim – luani fort dhe bëjeni Kosovën krenare!“, thuhet në njoftimin zyrtar të Ambasadës.
Ky veprim i diplomacisë amerikane shton dozën e entuziazmit në Prishtinë, pak orë para se në stadiumin „Fadil Vokrri“ të nisë ballafaqimi që pritet me emocion nga miliona shqiptarë anembanë botës.
