Shefja e Grupit Parlamentar të Lëvizjes Vetëvendosje (LVV), Arbërie Nagavci, ka deklaruar se subjekti që ajo përfaqëson është i gatshëm të mbështesë një rezolutë për gjenocidin serb në Kosovë, por ka kërkuar që përmbajtja e saj të dakordohet ndërmjet të gjitha grupeve parlamentare.
Në një konferencë për media pas mbledhjes së Kryesisë së Kuvendit, Nagavci theksoi se është e rëndësishme që kjo nismë të reflektojë unitet të gjerë politik dhe institucional, në mënyrë që të mos trajtohet si temë parciale e asnjë subjekti të vetëm.
„Ne jemi të gatshëm dhe kemi kërkuar nga PDK-ja që të ftojnë grupin punues për t’u dakorduar mbi përmbajtjen. Nuk kemi asnjë problem me një rezolutë që adreson gjenocidin e kryer nga Serbia dhe që siguron trajtimin e drejtë institucional të të gjitha masakrave. Jemi ndoshta vonë për ta adresuar këtë, por nuk jemi të interesuar që temat me interes shtetëror e kombëtar të trajtohen si çështje individuale“, deklaroi Nagavci.
Përplasja për KQZ-në: Anëtari i takon LVV-së Lidhur me çështjen e anëtarit të paemëruar në Komisionin Qendror të Zgjedhjeve (KQZ), Nagavci ishte e prerë se kjo e drejtë i takon Lëvizjes Vetëvendosje, duke u bazuar në rezultatin e zgjedhjeve të fundit dhe forcën proporcionale në Kuvend.
„Anëtari i paemëruar i takon Lëvizjes Vetëvendosje sipas legjislacionit në fuqi. Përbërja e KQZ-së duhet të përfaqësojë vullnetin e qytetarëve dhe ne presim që ushtruesja e detyrës së presidentes, zonja Haxhiu, ta emërojë sa më parë anëtarin tonë. Nëse jo, si lëvizje do ta adresojmë këtë çështje“, përfundoi ajo.
Kjo deklaratë vjen si kundërpërgjigje ndaj kërkesave të fundit të PDK-së, të cilët po ashtu pretendojnë anëtarin e dytë në këtë institucion.
