Shefja e Grupit Parlamentar të Lëvizjes Vetëvendosje (LVV), Arbërie Nagavci, u ka bërë thirrje për unitet të gjithë deputetëve të Kuvendit të Kosovës, duke theksuar se proceset e rëndësishme kushtetuese kërkojnë pjekuri të lartë politike.
Nagavci u shpreh se pret bashkëpunim nga secili përfaqësues i popullit, në një moment kur vendi po hyn në një fazë vendimtare pas vendimit të Gjykatës Kushtetuese.
“Rifillimi i punës së Kuvendit pas vendimit të Gjykatës Kushtetuese është një moment që kërkon qartësi, seriozitet dhe përgjegjësi. Jemi rikthyer jo vetëm në formalitetin e rendit të ditës, por në thelbin e funksionit tonë si përfaqësues të qytetarëve. Kuvendi i Republikës është vendi ku merren vendimet; nuk ka asnjë adresë tjetër ku mund të zhvendoset kjo përgjegjësi. Në këtë fazë kemi nevojë për unitet dhe bashkëpunim”, deklaroi Nagavci.
Zgjedhja e presidentit si test i pjekurisë politike Më tej, ajo nënvizoi se figura e presidentit duhet të shërbejë si simbol i unitetit, prandaj procesi i zgjedhjes duhet të udhëhiqet nga vullneti i përbashkët.
“Para nesh kemi një proces të rëndësishëm kushtetues, zgjedhjen e presidentit të Republikës, ku nga secila e secili prej nesh kërkohet pjekuri politike. Në emrin e çdo deputeti nënshkruhet serioziteti i këtij institucioni. Presidenti, si figurë e unitetit të popullit, thërret për një proces që duhet të udhëhiqet nga bashkëpunimi. Përgjegjësia është e jona. Qytetarët presin nga ne që të marrim vendime”, shtoi Nagavci.
