Ministria e Punëve të Jashtme dhe Diasporës ka konfirmuar se në orët e para të mëngjesit të sotëm është arrestuar nga autoritetet serbe Nexhat Pireva, shtetas i Republikës së Kosovës nga Kamenica dhe ish-pjesëtar i Policisë së Kosovës për rreth 14 vite.
Pireva ishte duke udhëtuar drejt Bujanocit së bashku me bashkëshorten dhe fëmijët e tij, kur u ndalua në pikën kufitare të Dheut të Bardhë nga strukturat e sigurisë së Serbisë. Pas marrjes në pyetje për rreth katër orë, ai është liruar dhe aktualisht ndodhet në liri.
MPJD ka dënuar fuqishëm këtë veprim, duke e cilësuar si keqtrajtim të vazhdueshëm ndaj shtetasve të Republikës së Kosovës dhe shkelje të hapur të marrëveshjeve të nënshkruara ndërmjet dy vendeve.
Ministria u ka bërë thirrje të gjithë qytetarëve të Kosovës që, deri në një njoftim të ri, të shmangin kalimin përmes territorit të Serbisë, me qëllim të garantimit të sigurisë së tyre.
Ky incident shton edhe më tej shqetësimet mbi qasjen provokuese të autoriteteve serbe ndaj qytetarëve të Kosovës, duke ngritur alarmin për rrezikun që përballen ata që lëvizin nëpër territorin serb.
