EKSKLUZIVE: Arrestohet personi që kërcënoi ish-kryeministrin e Kosovës, Ramush Haradinaj
Nga kërcënimi te prangosja: Kush është Skender Llugiqi?
Arrestimi i Skender Llugiqit nga Njësiti i Hetimeve të Përgjithshme të Drejtorisë Rajonale të Policisë në Prishtinë, i konfirmuar zyrtarisht nga zëdhënësja e policisë Flora Ahmeti, ka sjellë në vëmendje një profil që nuk është aspak i panjohur për autoritetet e rendit dhe drejtësisë.
Përtej rastit të fundit të kërcënimit ndaj ish-kryeministrit të Kosovës, Ramush Haradinaj, Llugiqi ka një të kaluar si konsumues i veprave penale dhe pjesëmarrës në incidente të dhunshme institucionale.
Incidenti i dikurshëm: Demolimi i ndërtesës së Qeverisë
Në të kaluarën, në emër të mbrojtjes së të drejtave të veteranëve, Llugiqi kishte qenë protagonist në protesta të dhunshme para ndërtesës së Qeverisë së Kosovës. Gjatë atyre protestave, situata kishte eskaluar rëndë kur protestuesit kishin përdorur dhunë, duke hedhur gjëra të forta dhe ngjyrë në drejtim të objektit qeveritar. Për këto veprime, ai kishte qenë i akuzuar zyrtarisht, duke dëshmuar se përplasjet me ligjin nuk janë një episod i izoluar në biografinë e tij.
Tashmë, me prangosjen e tij për rastin e fundit, autoritetet e drejtësisë pritet të ndërmarrin hapat e mëtejshëm ligjorë në bashkëpunim me Prokurorin e Shtetit për të zbardhur plotësisht rrethanat dhe motivet e këtij kërcënimi.
